Batea en terra alzouse co primeiro premio do Concurso de Ideas promovido polo Concello de Sanxenxo para remodelar a Praza do Mar. Este proxecto, do estudo madrileño Paredes e Pedrosa Arquitectos, levouse 30.000 euros de premio e a redacción do proxecto que dará un lavado de cara á imaxe da praza.
O segundo lugar foi para XXY de CPinos S.L que conseguiu un premio de 10.000 euros e, para rematar, en terceiro lugar, quedou o proxecto Cidadela Social de Unión Arquitectos, cun premio de 6.000 euros.
Os sete proxectos finalistas restantes leváronse un premio de 3.000 euros.
O Salón de Plenos do Concello foi o lugar elixido o luns para este anuncio no que estiveron presentes o alcalde de Sanxenxo, Telmo Martín, membros do consello de administración de Nauta e parte do xurado deste concurso.
Tras varios meses de deliberación o xurado tomou a decisión o pasado venres pola mañá aínda que os premiados non o souberon ata o luns, cando a secretaria do consello de administración de Nauta, xunto ao propio alcalde, procederon a abrir sóbrelos.
O xurado asegurou que "foi unha elección difícil porque as dez propostas finalistas son de gran beleza e arquitectónicamente moi interesantes".
BATEA EN TERRA. O proxecto gañador propón tres intervencións para remodelar a Praza do Mar. A primeira delas consiste en darlle unha nova imaxe ao edificio de capitanía e aos locais comerciais. Para o primeiro proponse unificar o seu volume e mellorar a súa estética exterior. Ademais, instalaríase un tellado cunha lixeira inclinación no que se incorporarían paneis solares que permitirían un importante aforro de enerxía. No caso dos locais comerciais, proponse instalar unha pérgola que achegaría sombra e melloraría a climatización.
A segunda intervención consiste na creación dun amplo xardín con vexetación autóctona que constaría dunhas pasarelas de madeira polas que os veciños e os visitantes do municipio poderían pasear. Para levar a cabo este punto do proxecto eliminaríanse as escaleiras que unen a Praza dos Barcos coa Praza do Mar
O proxecto gañador propón tres intervencións para remodelar a Praza do Mar
E, para rematar, a terceira intervención vira ao redor da instalación dun umbráculo. Esta construción consiste nun recinto cuberto e luminoso no que o sol non dará de cheo e que ofrecerá sombra aos viandantes. A súa estrutura suxeitarase en catro alicerces de madeira e o seu perímetro estará pechado por unhas paredes de cristal que contarán con efecto espello desde o exterior. Estes acabados permitirán gozar das vistas tanto da ría como da vila.
Desde o Concello aseguran que "a estrutura e materiais do umbráculo aseméllanse a unha batea en terra", de aí o nome do proxecto.
Esta última edificación ocupará o 25 por cento da superficie total da praza e permitirá albergar eventos culturais, deportivos, feiras ou congresos. A isto o Concello engade que "a flexibilidade deste recinto permitirá o seu uso en calquera época do ano e dotará a Sanxenxo dun edificio con maior capacidade que un auditorio ou pavillón de deportes, pero a un custo moi inferior".
O proxecto gañador tamén conta con melloras nas instalacións do porto pesqueiro, a incorporación dun miradoiro e dun auditorio ao aire libre.
Para levar a cabo varios destes cambios será necesario eliminar o paso de coches cara ao porto pesqueiro, o que se suplirá cunha entrada para estes coches polo parking Nauta que lles permitirá chegar a esa zona sen pasar polas novas zonas verdes. Ademais, tamén se eliminará a zona de parking provisional situada actualmente na parte superior da praza.
Eliminarase o paso de coches cara ao porto pesqueiro
Para o membro do xurado Celestino García "con este proxecto elixido este lugar convértese nun lugar central da ría".
PRESUPOSTO. O proxecto levará un investimento de 10.943.240 euros que, segundo afirma o Concello de Sanxenxo, "Nauta financiará sen que lle custe un euro aos veciños de Sanxenxo". Este financiamento levarase a cabo da mesma forma na que se fixo a concesión do porto e as consecuentes obras entre os anos 2003 e 2005.
Para poder levar este proxecto a cabo Nauta solicitará a ampliación da concesión actual co fin de poder financiar o proxecto "Batea en terra".
