Por mar, terra e aire. Así continuaron este xoves, aínda que de momento sen éxito, os labores de procura de Iván Harri Otero Rodríguez, o bateeiro da Illa de Arousa desaparecido na contorna da illa de Ons o pasado martes despois de que un golpe de mar envorcase a embarcación Rosa, na que faenaba xunto cun dos seus irmáns e con outro compañeiro, que si conseguiron chegar a terra e atópanse a salvo.
Por mar, mergulladores do Grupo Especial de Actividades Subacuáticas da Garda Civil (GEAS) volveron a rastrexar a zona próxima ao lugar no que desapareceu o mozo de 30 anos e tamén o fixeron o buque Sar Gavia e a embarcación Salvamar Sargadelos de Salvamento Marítimo, que logo foi relevada pola Salvamar Mirach. A elas sumáronse embarcacións de Gardacostas de Galicia, Punta Roncadoira e Punta Falcoeira, e a todos estes medios volvéronse a unir lanchas particulares e un numeroso grupo de mergulladores veciños da Illa e doutros puntos, que desde un primeiro momento e de forma voluntaria fixéronse ao mar para tratar de localizar o corpo do mozo desaparecido.
Segundo explicou o patrón maior da confraría da Illa, un barco bateeiro da mesma zona (o Vengarco) saíu tamén para dar apoio aos mergulladores, de modo que puidesen recorrer a el para cambiarse e descansar. "Ofreceuse desde ou primeiro momento. Todo ou mundo está a colaborar e tratando de axudar. De feito, hoxe había entre doce e catorce mergulladores rastrexando", precisou o patrón do depósito.
Lanchas particulares e un numeroso grupo de mergulladores apoian a procura de forma voluntaria
Unhas condicións meteorolóxicas inestables fixeron máis complicadas as labores. De feito, na xornada do xoves estaba activado aviso por ondada no litoral galego (amarelo na costa pontevedresa e laranxa en case todo o litoral da Coruña, segundo Meteogalicia), unhas alertas que, a priori, manteranse durante o venres.
En canto a medios aéreos, sobre as 10.30 horas sumouse ao operativo o helicóptero da Garda Civil Cuco para peitear a zona desde Fisterra e pola tarde deulle a substitución o Pesca 1 da Xunta.
A todos estes medios sumáronse tamén por terra efectivos de Protección Civil de Sanxenxo, O Grove e de Ribeira, ademais de persoal de apoio psicolóxico de Cruz Vermella para atender aos familiares do desaparecido, para os que o paso dos días está a facer aínda máis dura a procura.
De feito, o achado preto de Ons na mañá do pasado mércores dun pantalón, unhas chaves e un teléfono que Iván Otero levaba no peto no momento do accidente fixeron inicialmente saltar as expectativas de atopar o corpo, pero ata a noite do xoves os labores de rastrexo non deron resultados.
Os medios de procura detiveron o seu labor a última hora da tarde coa intención de retomala este venres e a esperanza de localizar por fin o corpo do mariñeiro.
