O corpo sen vida de Iván Harri Otero Rodríguez, mariñeiro desaparecido o pasado martes nas inmediacións da illa de Ons, foi trasladado na tarde deste venres ao porto de A Illa de Arousa, localidade da que era orixinario, logo de ser localizado durante a cuarta xornada do operativo de procura. O cadáver, segundo informou Emerxencias, foi atopado na contorna do illote O Centulo, un lugar moi próximo ao momento no que se lle deu por desaparecido tras o naufraxio da planadora na que traballaba. O achado rexistrouse sobre as 13.30 horas, tal e como explicaron fontes da Garda Civil de Pontevedra, cuxo Servizo Marítimo foi esencial nos labores de rescate tras o accidente marítimo.
Os servizos de rescate puideron recuperar o corpo do mozo arousán tres días despois do suceso. Foi o pasado martes cando desapareceu no mar, despois de que envorcase a embarcación Rosa na que faenaba xunto con outros dous tripulantes que conseguiron chegar a terra. O primeiro deles alcanzou a illa de Ons a nado, mentres que o segundo foi rescatado cando aínda se atopaba na auga con idéntico obxectivo que o anterior.
OPERATIVO. O operativo de procura activo desde ese mesmo instante continuou este venres por mar coa colaboración da embarcación do Servizo de Gardacostas Punta Roncadoira e o apoio da patrulleira do Instituto Armado. O achado do corpo, con todo, produciuse mercé á colaboración dalgúns dos voluntarios que se prestaron a cooperar coas autoridades competentes no rastro.
Desde terra, xa na Península, tamén traballaron na procura efectivos de Protección Civil de Sanxenxo, O Grove, Ribeira e Muros, para percorrer lugares da costa onde as correntes puidesen arrastrar o corpo do desaparecido.
As condicións climatolóxicas, con mar de fondo, dificultaban os labores que finalmente deron como resultado a localización do corpo sen vida da vítima na contorna da illa, onde se produciu o naufraxio.
Xa en A Illa de Arousa, numerosas persoas esperaron á embarcación que trasladou o corpo. Amigos, familiares e compañeiros do Céltiga C.F., club do que formou parte toda a súa vida, mostraron os seus respectos ao falecido.
