A directora xeral de Patrimonio da Xunta de Galicia, Belén Docampo, visitou esta semana acompañada do alcalde, Telmo Martín, e a concelleira de Cultura, Paz Lago, a fachada marítima norte da Ría de Arousa para coñecer in situ o terreo sobre o que se proxecta a recuperación dun enclave de enorme valor paisaxístico e ambiental.
Tal e como se comprometeu a conselleira de Medio Ambiente, Ángeles Vázquez, co alcalde, durante unha reunión recente, o departamento autonómico encargarase de realizar o proxecto integral de posta en valor e recuperación da fachada marítima cunha senda peonil que permita o goce desta contorna.
Esta senda, proxectada na fachada norte da ría, converterase nun atractivo turístico máis do concello de Sanxenxo, que todos os veráns rexistra un importante incremento de poboación, enriquecendo aínda máis a oferta de actividades ao aire libre para dar a coñecer entre os visitantes o patrimonio natural desta zona. A ruta é de aproximadamente sete quilómetros, dependendo do trazado elixido.
Durante a visita, prestouse especial atención a dous puntos concretos, a zona onde se sitúa A Telleira con vistas á Illa da Toxa e a zona das Lagoas, ambos os espazos constitúen un verdadeiro tesouro natural que tanto o goberno local como a Xunta de Galicia queren pór en valor.
A zona pertence á Rede Natura 2000 e está catalogada como Zona de Especial Protección Ambiental (ZEPA)
Desde a punta da Fianteira ata a ensenada do Bao na Revolta, esta costa reúne uns atractivos moi singulares, con outonos e invernos moi suaves e belas vistas do complexo intermareal O Grove - Umia. Ademais, é unha zona de avistamento de aves en calquera época do ano, especialmente no inverno.
A senda, que se atopa ao longo de toda a súa extensión en Rede Natura 2000, é ademais unha Zona de Especial Protección Ambiental (ZEPA), un lugar de Interese Comunitario ao formar parte dunha rede ecolóxica de áreas de conservación da biodiversidade que se estende por Europa e pertence ao convenio Ramsar da ONU por ser o hábitat de aves acuáticas.
O alcalde expuxo a Docampo que sería moi importante expor ao público o proxecto de recuperación da fachada marítima durante este verán para dar a coñecer a futura actuación que dependendo do custo total poderíase realizar por fases. O goberno comprometeuse a pór a disposición os terreos necesarios para acometer a senda.
