A pesar de que as restricións impostas para frear a expansión da covid son vox populi, as forzas de seguridade que operan na área sanitaria seguen sancionando todo tipo de incumprimentos. Sen ir máis lonxe, nos festivos da Semana Santa (entre o xoves e o domingo) a Policía Local de Vilagarcía tramitou 16 propostas de sanción por incumprir a normativa covid.
A maioría (11 casos) foron por saltarse o toque de queda sen causa xustificada, pero o curioso é que dentro destes os axentes detectaron varios infractores que, ademais de superar amplamente a hora límite (22.00 horas), estaban a realizar "accións pouco habituais para a hora na que se producían". Entre elas, unha persoa que se atopaba ás 1.30 da madrugada lavando o coche en plena vía pública, outra que paseaba en bicicleta ás 2.30 da madrugada polo paseo marítimo e outra que sacou o seu can a pasear á unha da mañá.
A estas denuncias sumáronse outras catro cursadas ante establecementos de lecer por superar o horario e outra a un particular por uso indebido da máscara.
Pola súa banda, a Policía Local de Poio tramitou un total de 21 denuncias administrativas durante a Semana Santa, a maioría delas por vulnerar a normativa covid.
Segundo precisaron este luns fontes municipais, seis persoas foron multadas por celebrar reunións entre non convivientes en domicilio, outras tantas por saltarse o peche perimetral e catro por non utilizar máscara.
