viernes. 25.09.2020 |
El tiempo
viernes. 25.09.2020
El tiempo

Noalla aspira a despachar máis de 25.000 unidades na Festa da Ostra

Presentación do evento gastronómico na Casa Forestal. D.P.
Presentación do evento gastronómico na Casa Forestal. D.P.

A cita desenvolverase na Lanzada entre o 10 e o 12 de agosto

O que comezou sendo unha actividade para recadar fondos de cara á celebración das festas patronais de Noalla acabou por converterse nunha das citas gastronómicas de referencia no municipio de Sanxenxo. Aos seus 27 anos, a Festa da Ostra goza dunha excelente saúde. Proba diso é a ambición coa que os seus organizadores afrontan esta edición, que se desenvolverá entre o 10 e o 12 de agosto na contorna da praia da Lanzada, á beira do campo de fútbol.

Segundo explicou o presidente da comisión, Roberto Garrido, "aspiramos a vender entre 25.000 e 30.000 unidades", todas elas fornecidas a través dunha depuradora de Cambados. No caso de que se esgoten existencias, bateríase a marca do ano pasado, cando se venderon as máis de 20.000 unidades que se puxeron a disposición dos comensais.

Como xa é habitual, a organización aposta por establecer prezos populares. Ademais, o menú será moi variado, xa que, ademais de ostras, tamén se poderá degustar empanada, polbo ou mexillóns ao vapor, entre outras especialidades.

Ao acto de presentación, celebrado este venres na Casa Forestal As Canteiras, acudiron, entre outros, o concelleiro de Turismo e Festexos, Jesús Sueiro, e o tenente de alcalde, Gonzalo Pita. Este último enxalzou o traballo realizado pola Comisión de Festas. "Este evento non deixa de medrar e os beneficios que se producen sempre van dirixidos a organizar festas e actividades para os veciños da parroquia de Noalla", recordou.

Pola súa banda, Roberto Garrido agradeceu a colaboración do Concello, aínda que confiou en que esta axuda aumente en próximas edicións. "Somos un grupo de veciños que traballamos e loitamos moi duro para que a Festa da Ostra saia cara adiante". Neste sentido, Garrido mostrouse orgulloso de que a recadación lograda en citas anteriores tamén serviu para custear parte das reformas da Casa Parroquial.

Noalla aspira a despachar máis de 25.000 unidades na Festa da Ostra
comentarios