Unha ruta de sendeirismo de cinco quilómetros de lonxitude e un miniparque forestal completan, desde este trimestre, a oferta de lecer da parroquia de Noalla. A directiva da Comunidade de Montes e o alcalde, Telmo Martín, acudiron esta semana á visita inaugural destas actuacións, promovidas polos comuneiros con fondos propios e unha achega do GDR Proder.
Tal e como explicaron na presentación, o investimento requirido para esta actuación foi de 150.000 euros, que se repartiron case ao 50%, requirindo a actuación da Lanzada 78.000 euros e o resto a rehabilitación da ruta de sendeirismo.
Tal e como explicou o secretario da Comunidade de Montes, José Manuel Rodiño, o Proder achegou un 35% para as actuacións da Lanzada, que incluíron a creación dun novo parque infantil para nenos e un parque forestal con mesas para merendeiro na parte máis baixa.
En canto á segunda actuación, a ruta de sendeirismo de Rego do Souto, é un traxecto que parte da zona de Major e discorre ata Os Tremóns, cun percorrido de cinco quilómetros. A ruta conta con tres muíños restaurados, un lavadoiro e varias mesas para o descanso dos visitantes. O alcalde percorreu parte deste espazo cos comuneiros e puido comprobar o traballo de restauración realizado no lavadoiro que se sitúa a metade de camiño desta ruta. Martín non dubidou en agradecer "á Comunidade de Montes de Noalla o esforzo, sobre todo nunha zona como é a contorna da Lanzada". Á súa vez recordou o investimento de dous millóns de euros que o Concello realizará para recuperar o pazo da Quintán e seguir dotando de referentes patrimoniais a parroquia.
