A empresa concesionaria do servizo de auga, rede de sumidoiros e depuración de Sanxenxo que resulte elixida no concurso publico terá que facer melloras valoradas en 11.632.277 euros, distribuídos en 81 actuacións repartidas nas sete parroquias do municipio. Os proxectos divídense en tres áreas de actuación.
Unha é a renovación das redes, con 15 obras que suman o 19% do investimento. Destaca a substitución da tubaxe de abastecemento de auga entre Major e Portonovo. Outras son a renovación dos colectores de Xuncablanca (Vilalonga), A Revolta (Noalla) e Rafael Picou (Portonovo).
A segunda é a instalación de novas redes, con 59 actuacións que concentran o 46% do investimento, que permitirá mellorar o servizo de 726 vivendas. As actuacións van beneficiar de xeito directo a 3.000 veciños.
O terceiro apartado son as novas instalacións de abastecemento, con sete intervencións que supoñen o 35% do investimento. A máis destacable é a construción dun novo depósito de auga de 5.000 metros cúbicos, que suporá incrementar a capacidade de almacenaxe un 28%. Outras actuacións relevantes son a conexión entre tómaa da auga do Umia e o depósito do Castro e deste con Padriñan e Major, en Noalla.
O prego de condicións establece que o 73% das actuacións executaranse nos dous primeiros anos da concesión, e o 27% restante nos dous seguintes.
Estas actuacións, xunto ás previstas no convenio con Acuaes, «converterán a Sanxenxo nun referente no tratamento e depuración das súas augas», afirma o Concello. «Coidar as dúas rías é o mellor investimento que podemos facer», agrega.
