O campo de fútbol do Revel contará con novo céspede sintético de última xeración ao longo do próximo ano. Esta é unha das actuacións que se inclúe no Orzamento municipal de 2020. En concreto, a intención do Concello de Sanxenxo é destinar unha partida de máis de 245.000 euros para efectuar unha serie de melloras nestas instalacións deportivas, nas que a substitución do tapete actual será a principal tarefa. Ademais, dotaráselle dun novo sistema de rega por aspersión.
As obras teñen un prazo de execución de dous meses e consistirán no desmonte e retirada do equipamento deportivo e do céspede artificial existente, para o que se utilizará unha maquinaria específica para este tipo de traballos. Posteriormente, será preciso extraer a area e o granulado de caucho, así como limpar o aglomerado asfáltico cunha varredora. A continuación, os operarios retirarán os canóns de rega da superficie e as electroválvulas existentes, para instalar canóns de rega emerxentes.
A vila conta con outros dous campos sintéticos en Baltar e A Lanzada, dous de herba natural (Vilalonga e Portonovo) e un de terra (Dorrón)
Con respecto á nova superficie, estará composta por unha base elástica prefabricada de 10 milímetros de espesor, céspede de última xeración e un pegado con dobre capa de polipropeno. Unha vez colocado, procederase ao recheo con area e granulado elástico.
Finalmente, a actuación concluirá co marcaxe e sinalización dos campos de fútbol-11 e fútbol-7. Cabe recordar que o terreo de xogo do Revel conta cunhas dimensións de 105 metros de longo por 65 de ancho. Actualmente as instalacións son utilizadas por unha ducia de equipos de diferentes categorías basee e senior, entre as que se inclúen clubs como o Vilalonga, o Sporting Club Liberdade ou equipos da liga Galega de Veteranos. É habitual que o campo se utilice de luns a venres entre as 16.30 e as 23.00 horas, sen contar os partidos dos fins de semana.
Deste xeito, o Concello de Sanxenxo dá resposta a unha demanda realizada por numerosos usuarios, que advertían do desgaste que padece o actual tapete. Desde a inauguración da infraestrutura, hai practicamente unha década, o céspede artificial nunca fora renovado, o que podía supor un risco para a integridade física dos deportistas. A vila conta con outros dous campos sintéticos en Baltar e A Lanzada, dous de herba natural (Vilalonga e Portonovo) e un de terra (Dorrón).
