A pandemia dispárase en Sanxenxo e os seus efectos están a estenderse a numerosos sectores de actividade neste municipio. O día 23 eran 83 os casos de covid-19 rexistrados e este domingo a cifra deu un vertixinoso salto ata alcanzar os 102. Unha das consecuencias que provocou foi o peche dunha gasolineira e dunha aula da Escola de Educación Infantil do Revel (Vilalonga).
A estación de servizo, de Repsol, permanece pechada desde o día 22. Unha nota divulgada polos seus propietarios expón que a medida preventiva de cesar a actividade foi adoptada ao detectarse varios casos positivos no seu plantel de traballadores.
"A nosa máxima responsabilidade é salvagardar a saúde do noso persoal, clientes e colaboradores, por iso tomamos esta difícil decisión, en concordancia coas autoridades, seguindo todas as pautas e indicacións marcadas", argumenta a súa dirección.
No mesmo escrito, fai constar a súa intención de porse en marcha de novo "con todas as garantías nun futuro próximo", anunciando a súa intención de volver "con forza", ademais de agradecer a "comprensión" de todos.
A segunda consecuencia da irrupción do coronavirus foi anunciada este domingo polo Goberno local, ao facer publico o peche dunha aula, destinada a alumnos dun e dous anos de idade, da Escola Infantil O Revel. O motivo é o positivo dunha nena que acode a este centro de Vilalonga.
Tanto os educadores como o resto dos alumnos deberán gardar corentena e todo eles serán sometidos a unha proba PCR nos próximos días, indica o Goberno local.
Con este peche, son cinco os centros cuxa actividade se está vendo condicionada e limitada pola pandemia. Na relación figura unha aula do Colexio de Educación Infantil Plurilingüe A Florida (dous casos), outra no Cruceiro (trece), cinco no Abrente, de Portonovo, e unha no Instituto de Ensino Secundario de Sanxenxo.
O ciclo entre este domingo 24 e o domingo 17 pechouse cun incremento de 60 casos: 42 fronte a 102, seguindo unha escalada progresiva cunha soa excepción: o luns foron 46; o martes 50, o mércores non se produciu variación algunha, o xoves 64, o sábado 83, e o domingo rexistráronse 19, situándose en 102.
