A construción do paseo marítimo de Vilaxoán e a rexeneración da fachada litoral será posible sen que este proxecto implique a eliminación dun dos dous carriis de circulación destinados aos vehículos. A fórmula alternativa que ten previsto aplicar o Concello de Vilagarcía é retranquear o muro da depuradora para gañar espazo e construír beirarrúas máis pequenas.
Esta iniciativa é un dos obxectivos marcados polo Goberno local. A Lei de Costas non permite que estes espazos voen sobre o mar, por iso é polo que elaborase unha primeira opción que non era viable, e que consistía na supresión dun carril e a regulación do tráfico con semáforos.
Para poder deseñar a nova proposta foi realizado un estudo cos técnicos de Espina & Delfín, co fin de determinar se era posible retranquear o muro da depuradora de augas, que discorre en paralelo ao paseo, pois existían dúbidas de se podería afectar a algúns dos desaugadoiros da planta. Comprobado que non había problema, encargou un novo proxecto.
Para poder acometer este novo deseño, o Concello retranqueará o muro unha media de 1,30 metros en todo o seu percorrido. Iso obrigará a que as beirarrúas sexan máis estreitas que no anterior, do mesmo xeito que o carril bici. Pasa dun ancho de 6,5 metros a outro de 4,5. O espazo reservado aos ciclistas tamén perderá medio metro, pero segue cumprindo coa normativa. Outro cambio é que, en lugar dun banco corrido que faga de varanda, será instalado un de metal e madeira, que ocupa menos espazo. A vexetación será de menor tamaño que a prevista inicialmente.
Estes traballos serán financiados con fondos europeos, a través da liña de mellora da sustentabilidade da área urbana. O investimento roldará os 300.000 euros e o Concello de Vilagarcía está a tramitar o proxecto, pero as obras aínda non comezaron, cando tiña previsto que o fixese no mes de setembro.
