O Albariño de Pazo de Rubiáns foi galardoado co "Acio de Ouro" ao mellor viño de Galicia polo xurado da Cata dos Viños de Galicia 2021.
Situado na comarca do Salnés, nas Rías Baixas, e cultivado en espaldera, o gran viñedo do Pazo de Rubiáns está orientado cara ao Atlántico de Arousa, nun dos lugares máis privilexiados e singulares do mundo para a elaboración de viños brancos, seguindo un procedemento artesanal, informa a organización.
En cada vendima, desde tempo ancestral, a uva recóllese a man en toda a leira que rodea este fermoso pazo galego, seguindo o compromiso persoal de Gonzalo Ozores de Urcola, décimo oitavo Señor da Casa de Rubiáns, co máximo esmero en todo o proceso.
Neste espazo singular, o cultivo vinícola convive cunha gran cantidade de plantas que conforman un parque botánico excepcional, que foi declarado Xardín de Excelencia Internacional, por contar cunha enorme variedade de especies botánicas e auténticos monumentos vexetais e especies únicas, entre as que destaca a gran variedade de camelias, a planta icónica do Pazo de Rubiáns.
