O Concello de Sanxenxo non pechará a billa das duchas... de momento. Aínda que a Administración municipal mantense firme no seu propósito de retirar estes dispositivos, por motivos ambientais e para garantir un uso máis responsable da auga, a súa eliminación non se fará de forma drástica, senón que se producirá de xeito paulatino. Así o garantiron fontes do Goberno local, que sinalaron que as duchas seguirán operativas mentres non se finalice a instalación de todos os lavapiés.
O Concello calcula investir máis de 14.000 euros na dotación destas pequenas billas, que estarán a disposición dos bañistas en poucas semanas. Deste xeito, prevese lograr un importante aforro no que a consumo de auga se refire. Cabe recordar que só durante o mes de agosto do ano pasado consumíronse máis de 7.000 metros cúbicos. Silgar levou a palma con 2.265 metros cúbicos, segundo os datos que manexa a empresa responsable do abastecemento.
Por outra banda, os traballos de instalación das balizas para a sinalización das zonas de baño continúan a bo ritmo e finaliarán en poucos días.
