Greenpeace está máis que afeito á hostilidade. Pero esta vez, segundo aseguran, non hai motivo. E non irán alí onde non queren recibilos, nin sequera en em <>son de paz.
A organización ecoloxista busca un porto no que o seu veleiro Rainbow Warrior poida facer escala tras serlle denegada a autorización tanto en Vigo como en Vilagarcía de Arousa, onde a embarcación ten previsto chegar este mesmo mércores.
Pero precisamente na vila arousá tamén hai quen recibiría ao buque cos brazos abertos. é o caso de Marea da Vila, o grupo de Podemos en Vilagarcía, quen montou un photocall este luns no mercadillo vilagarcián –na mesma entrada do Porto– en apoio á embarcación de Greenpeace.
A concelleira María de la O Fernández González encabezou esta iniciativa, que busca acoller do mellor xeito ao Rainbow Warrior, e para iso utilizaron o hashtag #HaiCalado.
POLÉMICA EN VIGO. Pouco antes de que se coñecese a decisión da Autoridade Portuaria de Vilagarcía de denegar a chegada do buque –o pasado fin de semana–, a oenegué facía público un comunicado no que cargaba contra o presidente do Porto de Vigo, Enrique López Veiga ao que acusan de hostilidade "explícita e absolutamente desproporcionada".
O aludido, pola súa banda, celebrou a anulación desta escala –"paréceme moi ben que non vingan aquí, non achegan nada", manifestou– minutos antes de volver censurar os "comportamentos vandálicos" e a campaña de "denigración" de Greenpeace cara aos pescadores de Galicia.
ás "agresivas" declaracións de López Veiga, Greenpeace engade outros impedimentos, como o amarre concedido ao buque no peirao pesqueiro, o que imposibilitaba a realización das actividades previstas, como un concerto, talleres para a cidadanía, visitas guiadas polo barco ou reunións con representantes políticos.
A Autoridade Portuaria de Vilagarcía alega razóns de seguridade para non autorizar as actividades anunciadas por Greenpeace na cidade
BUQUE. O Rainbow Warrior percorre os portos españois dentro da campaña En marcha polo clima, que antes de Galicia pasou xa polos portos de Barcelona e de Málaga.
O obxectivo da visita do Rainbow Warrior, recalca Greenpeace no seu comunicado, é achegar á cidadanía o seu proxecto, que denuncia as consecuencias do cambio climático e informa as opcións dispoñibles para a participación cidadá activa na transición enerxética.
Mario Rodríguez Vargas, director de Greenpeace España, lamenta "profundamente" que o presidente do porto de Vigo rexeite reunirse coa organización a bordo deste buque e que poña "todos os obstáculos ao seu alcance" para que non se puidesen desenvolver as actividades públicas previstas durante a súa escala.
Destaca que, de aceptar esta invitación, podería exporlles os avances en materia de protección do medio ambiente e loita contra o cambio climático que se están adoptando no porto vigués "sen necesidade de recorrer aos excesos verbais e a ocorrencia" que lle caracterizan cando fala de Greenpeace.
"Isto sería o apropiado nunha democracia moderna e avanzada e o que se espera de quen preside a Autoridade Portuaria dun porto de relevancia nacional e internacional", engade Rodríguez.
Cecilia Carballo, directora de programas de Greenpeace, sinala a López Veiga como "o único responsable de que a cidadanía viguesa non poida recibir ao Rainbow Warrior na súa cidade, como miles de persoas desexarían".
Pola súa banda, a Autoridade Portuaria de Vilagarcía alega razóns de seguridade para non autorizar as actividades anunciadas por Greenpeace na cidade.
O Porto de Vilagarcía aclara que "o único peirao que se axustaría ás necesidades" de Greenpeace é o de Pasaxeiros, "o cal, por razóns de calado, non pode acoller ao barco da organización", puntualiza.
