O Concello de Sanxenxo e Portos de Galicia asinarán un convenio para habilitar como estacionamento público unha zona do varadero de Portonovo con capacidade para 80 vehículos. Como en veráns anteriores, a medida conta co acordo da Confraría e do colectivo hostaleiro Can de San Roque, e será posta en marcha o 9.
A presidenta de Portos de Galicia, Susana Lenguas, mantivo o pasado mércores un encontro de traballo co alcalde, Telmo Martín, e a concelleira de Planificación Territorial, María Deza, ao que seguiu unha visita aos portos de Sanxenxo e Portonovo, onde analizaron as accións que levarán ao cabo.
O acceso limitado con valo móbil do posto de Portonovo rexistrou varias roturas ultimamente
A mellora do acceso á lonxa e ao porto de Portonovo será obxecto de estudo por parte de Portos de Galicia. O patrón maior, Juan José Besada, pediulle que tome medidas para tratar de reducir a velocidade no acceso limitado con valo móbil, despois de que se detectasen continuas roturas provocadas por vehículos que acoden á zona. Algúns fano a unha velocidade excesiva e levan o valo por diante, coa consecuente avaría do sistema, explicou.
O alcalde mostroulle a localización da illa de colectores soterrados, cuxa instalación está prevista na zona portuaria. Será levada a cabo nos próximos días, co mesmo modelo de Sanxenxo. Lenguas mantivo un encontro co patrón da Confraría, Sauro Martínez, no que lle expuxo varias peticións.
Telmo Martín pediu á presidenta de Portos a demolición da rampla da praia dos Barcos, un acceso que non se utiliza e que serviría para gañar espazo para o areal. O Concello solicitará un proxecto para executar a derriba e dar maior amplitude ao areal.