O Club Náutico de Portonovo, en Sanxenxo, instalou a primeira plataforma flotante de loita contra o lume e a contaminación mariña que hai nos portos deportivos de Galicia.
Con esta plataforma, o porto busca mitigar os efectos do cambio climático e contar cunha infraestrutura que lles permita conter, minimizar e previr as consecuencias dun posible accidente nas súas instalacións.
O sistema dispón dun equipo móbil de loita contra incendios mariños, material para a contaminación mariña por hidrocarburos e un equipo de recollida de augas negras e grises.
Permite atender sinistros marítimos por incendios en embarcacións, unha contaminación mariña por hidrocarburos ou a recollida de augas de sentinas e negras.
Todo iso contribuiría a paliar o efecto dun posible desastre marítimo dentro da ría.
Esta actuación contou co financiamento do Fondo Europeo Marítimo de Pesca da Unión Europea (FEMP), con apoio da Consellería do Mar da Xunta de Galicia e o Grupo de Acción Local do Sector Pesqueiro da Ría de Pontevedra.
