A campaña Fame de experiencias impulsada por Turismo Rías Baixas en 2019 para promocionarse como destino turístico, logrou a medalla de prata no TV&Filme Awards Festival de Nova York.
A peza audiovisual que acompañaba a esta campaña, elaborada pola empresa de Pontevedra Esmerarte, foi a única representación española en obter un premio na categoría de turismo, logo de entrar con Madrid nos quince finalistas ao galardón.
Este é o terceiro recoñecemento a esta campaña, que logrou o premio en FITUR ao mellor audiovisual e que tamén foi premiada no certame The Golden City Gate de Berlín.
A presidenta da Deputación de Pontevedra, Carmela Silva, asegura que este galardón demostra que "iamos polo bo camiño" para situar a provincia de Pontevedra entre as preferencias dos turistas.
Entende que Turismo Rías Baixas "acertou" apostado por promocionarse como un destino "sostible e ligado ao territorio" e que pon en valor o medio natural, a gastronomía e as súas xentes, apostando pola "proximidade".
"Temos que seguir traballando para que logo desta situación de confinamento sexamos capaces de reinventarnos para seguir sendo un destino turístico con gran potencialidade", engadiu Silva.
