O deputado do PSdeG Julio Torrado anunciou este xoves a súa intención de levar a debate no Parlamento de Galicia o “caos organizativo” do que é responsable a Xunta de Galicia neste inicio de curso nos colexios da comarca de O Salnés.
Torrado participou este xoves nas mobilizacións nesta zona convocadas pola comunidade educativa para toda Galicia ante o -criticou- “abandono e inmovilismo” dun Goberno galego que non deu resposta “ás necesidades dos centros educativos para garantir a seguridade hixiénico-sanitaria” no medio da pandemia de covid-19.
Nun comunicado remitido aos medios, o parlamentario socialista expón que a situación rexistrada nunha escola de Meis é “a paradigma do desastre” da xestión da Xunta, posto que se ve obrigada a iniciar un novo curso presencial “sen equipo directivo polo positivo dun dos seus membros”.
“Sorprende a ausencia de resposta por parte da Xunta sobre medidas especiais a tomar e o ditame de que o curso debe empezar igualmente sen equipo directivo e sen que estes poidan achegar o seu labor docente”, trasladou.
Torrado cargou duramente contra a “virtual desaparición” do Goberno galego neste asunto e sinalou que, ante a súa ausencia, foi o concello o encargado de realizar “as xestións para cubrir as probas serológicas necesarias para o persoal que mantivo contacto recentemente co positivo detectado”.
