A Policía Nacional recuperou en Vilagarcía de Arousa dúas bicicletas que lle roubaron a semana pasada ao ciclista galego Gustavo César Veloso, que milita actualmente no equipo W52-FC Porto portugués. Os axentes detiveron en relación a este roubo dous mozos veciños de Vilagarcía de 28 e 19 anos, aos que se lles imputa un delito de roubo con forza.
O roubo das dúas bicicletas, valoradas en 11.500 euros, produciuse o pasado 24 de maio, segundo informan fontes policiais. O deportista denunciou que os autores do roubo accederan á parcela da súa vivenda tras saltar un muro de pedra duns dous metros de alto, tras o cal subtraeron as dúas bicicletas do interior dun alpendre.
Unha pertencía ao equipo profesional co que corre Gustavo César Veloso e, ademais de ter as cores do club, estaba montada no rodete no momento do roubo.
O achado foi posible grazas á chamada dun veciño de Vilagarcía que aseguraba que vira no garaxe dunha vivenda unha das bicicletas, que recoñeceu despois de ver unha fotografía difundida polo ciclista nas redes sociais.
Tras acudir a ese lugar e recuperar a bicicleta, a Policía Nacional localizou o suposto responsable do roubo, que foi detido. Este declarou aos axentes que a outra bicicleta estaba en posesión dun amigo seu, que foi localizado e arrestado.
As dúas bicicletas foron devoltas este luns ao seu propietario.
