A rehabilitación integral da rúa Progreso non afectará ao tráfico durante a tempada estival. As obras permanecerán en standby desde finais do presente mes de xuño ata setembro. Será entón cando Covsa, a empresa responsable de facer realidade este ambicioso proxecto, retome o tramo final dunha actuación que se iniciou a principios de ano e que está a obrigar a cortar a circulación en ambos os carrís de forma alternativa (nalgúns casos, incluso foi necesario prohibir o tránsito rodado para realizar traballos moi específicos).
A conselleira de Infraestruturas e Mobilidade, Ethel Vázquez, e o alcalde de Sanxenxo, Telmo Martín, confirmaron este venres que a paralización da actuación farase efectiva en poucas semanas. E é que, tal e como explicou o rexedor en funcións, "percibimos que xa están a empezar a chegar visitantes á nosa vila, polo que, se mantemos a rúa cun só carril operativo, isto pode ser un caos". Martín recordou que, en principio, estaba previsto que a obra estivese concluída antes de agosto. No entanto, tanto a Administración local como a autonómica acordaron que os traballos cesen ata que finalice a tempada alta estival. "Atendemos á petición do Concello porque é xusto e necesario que se realice esa suspensión temporal, de xeito que se poida facilitar o tránsito de verán sen interferir na actividade hoteleira e dos comerciantes", indicou a titular autonómica de Infraestruturas e Mobilidade.
Tanto Martín como Vázquez Mourelle deixaron claro que, á marxe desta medida, os traballos están a realizarse "a moi bo ritmo". Tanto é así, que a día de hoxe executouse xa o 65% da actuación aproximadamente. O alcalde en funcións sanxenxino calcula que para cando se paralicen as obras "probablemente xa estea listo o 75% do proxecto", de xeito que, unha vez superado o verán, tan só sería necesario acometer o 25% restante. "Para entón só quedaría realizar os traballos na superficie", explicou Telmo Martín, que recordou que un dos principais escollos aos que se tiveron que enfrontar os operarios é á instalación das novas canalizacións subterráneas da rede de augas. "A colocación desas tubaxes foi o que levou máis tempo", subliñou.
Deste xeito, para despois do verán quedará pendente a finalización das novas beirarrúas, que terán un ancho de 1,8 metros, a dotación de zonas axardinadas ao longo da travesía e a instalación das rotondas. Unha delas situarase ao comezo da avenida Madrid, mentres que a outra estará situada á altura do cruzamento existente nas inmediacións do Hotel A Terraza. "Con esta actuación logramos o obxectivo de mellorar a mobilidade, a visibilidade e a seguridade viaria, a través dunha reordenación que fará que esta rúa pase a ser moito máis cómoda para os seus usuarios", garantiu Ethel Vázquez.
Así mesmo, a Consellería de Infraestruturas e Mobilidade ten previsto acometer unha mellora no tramo comprendido entre A Granxa e Areas, para eliminar puntos de concentración de accidentes. Trátase dun proxecto que xa está en fase de adxudicación, tal e como recordou Ethel Vázquez, que aproveitou a súa visita a Sanxenxo para pasar revista ás obras que se están acometendo no acceso á praia da Carabuxeira, iniciadas hai poucas semanas.
Poio
A maiores, tamén se están a executar obras na PO-308 entre as parroquias de Samieira e Raxó, en Poio. Con respecto á rehabilitación da rúa Progreso, o investimento ascende a 2,5 millóns de euros, aínda que o 30% asúmeo o Concello.