A recepción dos Reis Magos, que este ano se celebrará no corredor de entrada de Fexdega por mor da pandemia, conta con 400 inscricións e son 1.880 as que entregará o Concello de Vilagarcía. As entradas, gratuítas, foron postas a disposición do público o día 24 e a súa demanda é constante. Por este motivo, o Goberno local anima aos interesados a anotarse canto antes, facilitando así a organización do evento.
Para cumprir estritamente as normas covid-19, a recepción realizarase en catro xornadas consecutivas. Os días 2, 4 e 5 (sábado, luns e martes) o horario será de 16.00 a 21.00, mentres que o domingo 3 desenvolverase en horario de mañá, de 10.00 a 14.00 horas. Os Reis Meigos estarán a disposición dos nenos de Vilagarcía durante 24 horas.
O procedemento de participación é sinxelo. Basta con entrar na páxina web www.reismagosvilagarcia.org, directamente; tamén a través da web do Concello, www.vilagarcia.es, ou nos perfís oficiais da Administración local en Facebook e en Instagram.
