A residencia Domusvi-Ribadumia anunciou este mércores que xa se atopa "libre de covid, non habendo ningún residente en illamento por esta enfermidade". Segundo indican os seus responsables, os residentes están a volver "aos poucos aos espazos comúns, co fin de alcanzar por fin certa normalidade", mentres o centro traballa para reactivar as visitas, "seguindo as recomendacións das administracións públicas".
O parte oficial facilitado este mércores polo Sergas recolle, aínda así, que na residencia segue habendo un usuario e nove traballadores que continúan aparecendo rexistrados como casos positivos, aínda que a diferenza de cifras pódese deber ao atraso con que ás veces informa a Administración.
Segundo ese mesmo parte, na Residencia Soremay (Pontevedra) hai 39 usuarios e 15 traballadores que seguen coa enfermidade, e na Residencia Pontevedra (Vilaboa), 31 maiores e 14 empregados.