Sanxenxo dá o paso previo á edificación do complexo de servizos no polígono

Un total de 18 meses é o tempo estimado para a construción do complexo municipal de servizos no polígono de Nantes, unha vez que se adxudique o proxecto. Neste sentido, o Concello de Sanxenxo acaba de dar un importante paso previo á construción deste conxunto de naves ás que se trasladarán varios servizos como Emerxencias ou a Policía Local.

Trátase da aprobación da contratación do proxecto de execución do complexo, no que se definirá con detalle o proxecto arquitectónico para proceder ao execución.

O consello de administración da empresa pública Ínsua Sanxenxo deu luz verde por unanimidade a este procedemento, por un importe máximo de 150.000 euros (IVE incluído). A construción desta nave, que conta cun orzamento total de 5.785.418 euros, permitirá ás arcas municipais un aforro de 38.115 euros anuais polo aluguer da actual nave de Servizos e a concentración de varios deles nun mesmo espazo.

O anteproxecto contempla a construción de catro edificacións ou naves destinadas á Policía Local (300 m2), Emerxencias (200 m2), nave para servizos xerais (2.000 m2) e espazo coworking ou viveiro de empresas (máx.1500 m2). Ademais, contémplase unha oficina para servizos xerais (100 m2) e unha estación para almacenamento da iluminación pública (600m2).

As naves destinadas a almacén e ao servizo de Emerxencias contará con dous corpos, o principal destinado á nave de servizos, nunha única planta situada sobre planta baixa e un soto que ocupa parte da superficie.

O outro corpo estará destinado a Emerxencias, cunha planta baixa destinada a aparcadoiro e outra para servizos. O edificio destinado a coworking terá tres plantas, así como unha planta soto destinada a aparcadoiro, mentres que a nave da Policía Local contará con dúas plantas.

En canto ao aspecto exterior das naves prevese un sistema de cerramento exterior transventilado con paneis de formigón con fibras e un sistema de parasois verticais e celosías de aluminio.