O xurado do concurso de ideas para o mercado de abastos de Sanxenxo reuniuse este martes por primeira vez para recoller a documentación dixital das propostas, visitar o edificio e o seu enclave e visualizar os paneis coas 60 ideas seleccionadas, expostas na Sala Nauta.
Ao encontro asistiron os seis vogais que forman o xurado, todos eles arquitectos: Francisco Pico, (Consellería de Economía), José Jorge (Colexio de Arquitectos de Galicia), Flavia Besada (edil de Urbanismo), Rafael Vázquez (arquitecto municipal), e Carlos Quintáns, proposto polos concursantes. O tesoureiro, Luis Sabariz, actuou como secretario.
O xurado volverase a reunir o día 9 de novembro, de forma telemática, para realizar unha primeira criba tras analizar as sesenta propostas, que derivará na selección dos sete finalistas e, para rematar, a elección do gañador do concurso.
O proxecto contempla a construción dun edificio de cinco plantas e dous sotos. Recolle tamén o acondicionamento da contorna e das rúas adxacentes, para o que está consignado un orzamento de 4.512.329 euros.
O xurado decidirá a mellor proposta non só estética, senón tamén funcional, que permita sacar o maior aproveitamento dun edificio situado no centro de Sanxenxo.
"Gustaríanos facer do novo mercado un espazo emblemático, que sexa un referente non só a nivel estético senón tamén operativo e funcional", expuxo o alcalde de Sanxenxo, Telmo Martín, que preside o xurado. "Hai calidade e orixinalidade e agora hai que analizar a que sexa unha proposta transversal que dinamice ou contorna", engadiu o rexedor logo de contemplar a exposición.
O 19 de novembro será elixida a proposta gañadora entre os sete proxectos finalistas. O primeiro premio está dotado con 20.000 euros, o segundo con 6.000 e para o terceiro están destinados 3.000.
Ademais, tamén serán entregados catro accésits, dotados con 500 euros cada un. A idea que resulte elixida polo xurado podería ser a adxudicataria da redacción e dirección do proxecto, se así o considerase o Goberno local de Sanxenxo.
