Un total de 62 imaxes en cor que reflicten a riqueza dos fondos mariños, e moitas delas realizadas na contorna de Punta Seame, forman parte da mostra que ata o día 31 pode verse na exposición do Club Sotavento, na Sala Nauta de Sanxenxo.
A concelleira de Cultura, Paz Lago, acudiu este xoves á inauguración, do mesmo xeito que o secretario do Club Sotavento e subcampión de España 2017 de Cazafotosub, Héctor Costa; o presidente da Federación Galega de Actividades Subacuáticas, Javier Núñez, e o campión do mundo de pesca submarina coa selección, Jacobo García. Ao acto tamén asistiron o presidente do CETS, Afonso Martínez, e do Clúster de Turismo de Galicia, Cesáreo Pardal.
A mostra forma parte da programación das Xornadas de Actividades Subacuáticas da entidade organizadora.
Lago destacou a calidade da mostra e subliñou a súa achega ao programa de actividades de verán. "Teño que agradecer e felicitar ao Club Sotavento por actividades como esta, que ten unha calidade marabillosa que nos achegan especies descoñecidas do noso mar", sinalou a concelleira.
O Club Sotavento programou para o día 18 o XIX Campionato Galego de Cazafotosub en apnea, no espigón do porto de Portonovo, co que colabora o Club Náutico desta localidade.
O final da exposición coincidirá coa proxección do audiovisual 'Ollo de peixe', do campión do mundo Jorge Canda, que se celebrará na Praza dos Barcos ás 22.30 horas, e coa poxa benéfica de imaxes, cuxa recadación será destinará a un colectivo que realiza actividades de carácter benéfico do municipio.
