Sanxenxo pecha un verán "excelente" en ocupación, maior que a de 2018

A falta de computar a totalidade dos rexistros desta última quincena de setembro, o Consorcio de Empresarios Turísticos de Sanxenxo (CETS) asegurou este venres que as cifras globais de ocupación este verán son "excelentes" na vila, o que a sitúa como "líder" do turismo vacacional de Galicia e como "o referente" dos destinos do norte de España. Nos primeiros quince días deste mes, a ocupación xeral nos establecementos da localidade foi do 76,02%, o que, segundo apunta o organismo que preside Francisco González, supón un incremento do 1,95% con respecto ao mesmo período de 2018. 

Con respecto ás estancias, nas dúas primeiras semanas de setembro, os hoteis que maior porcentaxe de ocupación rexistraron foron os de catro estrelas, cun 95,31%, seguidos dos de tres, cun 81,09%. Por encima do 70% situáronse os cámpings (78,67%), os apartamentos turísticos (75,52%) e os hoteis de dúas estrelas (71,90%), mentres que os dunha estrela e as pensións alcanzaron un 53,62%. 

Este balance "positivo" do verán que realiza o CETS queda avalado polas cifras en crecemento que se produciron durante toda a tempada, unha subida que xa veñen rexistrando desde o pasado abril. Así, en xullo o número de pernoctacións foi un 10% superior ás do mesmo mes de 2018 e en agosto os establecementos alcanzaron o 90% de ocupación, a pesar do tempo inestable que se mantivo durante todo o estío. 

O CETS apunta que unha porcentaxe importante dos establecementos mellorou o seu Revpar (Revenue Per Available Room), é dicir, o ingreso por habitación dispoñible, ao manterse a ocupación, aínda cun mes de xullo dominado pola inestabilidade meteorolóxica "que non recordabamos en moitos anos", admite o organismo, e un mes de agosto no que o tempo "non foi o noso mellor aliado". 

CONSUMO E CALIDADE. Con respecto á primeira quincena de setembro, os 102 asociados do CETS enquisados valoran o nivel de consumo cun 3,87 sobre 5, o que supón un pequeno crecemento con respecto ao exercicio anterior, que se cifrou en 3,22 sobre 5. Aínda así, en termos xerais, o sector en Sanxenxo detectou un retroceso no consumo, unha circunstancia que, di, non é un feito exclusivo da súa zona, senón que se repite noutros destinos turísticos tanto de Galicia como do resto de España. 

Continuar coa recuperación de prezos, sobre todo máis aló do mes de agosto, é "clave", segundo o CETS, para garantir un turismo de calidade mediante a modernización das instalacións e servizos e atraer a clientes con maior poder adquisitivo. 

O colectivo sinala que Sanxenxo é un destino "con identidade propia" no que se "impón a calidade" en número de certificacións e selos públicos e nas valoracións de clientes e usuarios. O índice de calidade media obtido polos seus establecementos de aloxamento hostaleiro revela que de 104 establecementos, 27 foron valorados cunha puntuación superior aos nove puntos sobre dez e 67 superaron as oito puntas, unha nota media dun 8,8 que en termos de valoracións de aloxamentos cualifícase como "moi ben", rozando o "fantástico", segundo os datos obtidos do portal Booking en base a comentarios de clientes que estiveron aloxados no municipio. 

O 70%, ESPAÑOLES. O turismo nacional segue tendo un peso maioritario en Sanxenxo, supoñendo case o 70% durante a tempada estival. En canto ao interno, representado polos residentes en Galicia, sitúase no nivel máis alto en referencia ao mercado español. 

A especialización en novos segmentos de mercado e o incremento de viaxeiros estranxeiros son dous dos obxectivos que se marca o sector. Para iso, ve necesario consolidar produtos turísticos que teñan como base a gastronomía, os deportes náuticos, o lecer nocturno, o enoturismo, a natureza, o golf e o turismo de litoral, entre outros atractivos.