O Concello de Sanxenxo prepara un plan de actuación para a posta a piques dos servizos de fronte ao verán, que se viron atrasados ou paralizados durante os últimos días a causa do estado de alarma. Así, Sanxenxo xa pensa “no día despois”, anticipándose ás esixencias do verán no municipio, debido á cantidade de poboación que alcanza durante a tempada alta. “Ninguén está seguro de cando se levantarán as restricións, nin tampouco cal vai ser o comportamento dos españois, se van viaxar máis, igual ou menos. En calquera caso, a obrigación do Goberno é prepararse e, se cabe, mellor mesmo que en veráns anteriores, posto que o nivel de esixencia do visitante vai ser maior”, asegurou o alcalde, Telmo Martín.
Algúns dos preparativos en marcha víronse interrompidos pola declaración do estado de alarma como, por exemplo, a adxudicación do balizamento das praias, que quedou suspendida a falta de tres días para concluír o prazo de presentación de ofertas. Aínda que se descoñece se o Estado “autorizará fórmulas de contratación máis áxiles pola situación extraordinaria”, Sanxenxo está a prepararse para que “o primeiro día que se recupere a normalidade póñanse en marcha os traballos de equipamento e posta a piques das praias, os reforzos de servizos de limpeza e de seguridade cidadá”.
No caso das praias, ademais do balizamento, está pendente a licitación da limpeza de baños, os quioscos de Silgar, Baltar e unhas tumbonas da Lanzada, e tamén a montaxe de módulos, torretas, pasarelas, lavapiés, o control sanitario dos areais, o programa das bandeiras azuis, a compra de dous novos módulos e dous torretas de vixilancia.
Segundo informou o Goberno local, trabállase tamén na mellora dos contedores de recollida de lixo, para substituír os que agora hai nas vilas de Sanxenxo, Portonovo, Vilalonga e A Revolta por uns novos de carga lateral, así como instalar dúas novas illas de recollida e reciclaxe como as do porto deportivo.
Sanxenxo reforzará a Policía local de fronte ao verán coa contratación de máis de 30 auxiliares. aínda que o groso do reforzo incorpórase o 15 de xuño, o pasado luns empezaron a prestar servizo catro auxiliares e, a curto prazo, farano tres máis. Tamén está prevista a substitución da maior parte do parque móbil da Policía, é dicir, ciclomotores e turismos.
Outro asunto por axilizar é a selección dos socorristas e sanitarios que este ano “seguramente haberá que incrementar”, dependendo do número de bandeiras azuis que obteña finalmente Sanxenxo.
FESTAS. O Goberno tamén traballa nos preparativos da programación cultural de verán, as festas de San Roque, San Ginés e Santa Rosalía.
