SANXENXO. O Goberno local de Sanxenxo mantivo onte dúas reunións cos veciños do municipio. En Dorrón, case un centenar desprazáronse ata a Casa de Cultura para coñecer o anteproxecto dunha ruta de sendeirismo, de 4.560 metros de lonxitude, que percorrerá as beiras do río de Dorrón, desde a praia de Areas ata o Muíño de Xián. O punto de partida estará na parroquia de Bordóns.
Os veciños xa xestionaron a cesión dos terreos para que este anteproxecto sexa unha realidade. A execución do mesmo estará dividida en tres actuacións. Unha delas consistirá en movementos de terras e obras nos firmes. A continuación serán construídos os muros e instalados os pasales e a varanda de madeira. Realizados ambos os traballos, procederase á sinalización. O orzamento aproximado para a licitación é de 380.000 euros.
Para a ruta do río Fabaíños, a comisión formada por cinco veciños, de Arra, Noalla e Adina, continúa traballando na localización dos aproximadamente 100 propietarios dos terreos afectados polo trazado da senda e coas negociacións para lograr as cesións necesarias.
Neste caso trátase dunha ruta de sendeirismo de 4.655 metros de lonxitude, que percorrerá as inmediacións da canle, desde a contorna do Mercado de Abastos de Portonovo ata o cruceiro de Monte Faro.
O orzamento aproximado para a licitación desta obra é de 350.000 euros.
O Concello de Sanxenxo expón que con estas iniciativas persegue o obxectivo de aproveitar as oportunidades que brinda a contorna rural para potencialas como recurso turístico.