O Sergas realizará un novo cribado en Meis con test rápidos de antíxenos para detectar casos de coronavirus que non presenten sintomatoloxía.
Fontes da área sanitaria de Pontevedra e O Salnés detallaron que as probas se realizarán no centro de saúde de Mosteiro entre a tarde do venres e a mañá do sábado para detectar o maior número posible de portadores asintomáticos de covid-19 e reducir a cifra de contaxios no municipio.
Deste xeito, o Sergas invitará a participar nesta iniciativa preventiva a poboación de Meis de entre 30 e 60 anos cuxa tarxeta sanitaria estea asociada ao centro de saúde do municipio, un colectivo que suma 1.658 persoas.
O cribado dará comezo ás 15.30 horas deste venres no centro de saúde e contará coa participación de tres equipos de enfermería por quenda que efectuarán tarefas de control e cumprimento de medidas de seguridade, así como de procesado das tomas das mostras e traslado de información.
Os resultados negativos deste cribado notificaranse por SMS, mentres que os positivos comunicaranse por vía telefónica.
