Axentes da Garda Civil comisaron en Portonovo, no municipio de Sanxenxo, 100 quilos de ameixa de procedencia ilegal que transportaban tres persoas con antecedentes por furtivismo nun vehículo que non reunía as condicións requiridas para trasladar a mercancía.
Segundo informou o Instituto Armado, o turismo foi interceptado sobre as 13.40 horas do pasado mércores nun control de estrada realizado pola unidade de seguridade cidadá na estrada da Lanzada (PO-308), á altura do quilómetro 31, na vila de Portonovo.
Os axentes comprobaron que o vehículo estaba ocupado por tres persoas, todas elas con antecedentes por furtivismo, e ao rexistrar o coche localizaron unha báscula e sete sacos cun total de 100 quilos de ameixa indocumentada.
Como o vehículo non reunía as condicións para transportar a ameixa nin os ocupantes puideron acreditar a procedencia legal do marisco, procedeuse ao seu comiso e entrega á Confraría de Pescadores de San Telmo de Pontevedra, e denunciouse ao condutor e responsable da mercancía, veciño de Poio.
En concreto, o home foi denunciado por exercer a actividade extractiva a pesar de carecer de licenza, por transportar produtos procedentes do marisqueo sen a preceptiva documentación e por cometer unha terceira infracción grave no prazo de dous anos.