Unhas 30 persoas encerráronse este luns na casa consistorial do municipio da Illa de Arousa en protesta contra a decisión da Xunta de Galicia de suprimir a área sanitaria do Salnés.
O peche foi convocado pola Plataforma en Defensa da Sanidade Pública do Salnés e varios dos seus representantes, acompañados por veciños do municipio, presentáronse ás 9.00 horas nas dependencias municipais e decidiron manterse no hall que dá acceso ás instalacións.
O peche desenvolveuse sen ningún tipo de incidentes e co beneplácito do goberno socialista insular, que desde o primeiro momento manifestou o seu apoio a esta protesta. "Sentímonos moi arroupados ata o punto de que os funcionarios municipais trouxéronnos unhas cadeiras para que estivésemos máis cómodos", sinalou a portavoz da plataforma Rosa Casal.
A medida que transcorría a mañá varios veciños da Illa fóronse sumando ao peche. Ás 12.00 horas os encerrados abandonaron o interior das dependencias municipais para participar, xunto a varias decenas de persoas, nunha concentración ás portas do Concello, na que de novo se fixo público o rexeitamento á supresión da área sanitaria e a defensa da sanidade pública galega.
Finalizada a concentración, os encerrados volveron ao hall da casa consistorial onde permaneceron ata as 15.00 horas deste luns.
PACÍFICO
A portavoz da plataforma valorou este primeiro peche, tanto polo modo pacífico no que se desenvolveu como polo apoio que recibiron por parte dos insulars ao longo de toda a mañá.
Rosa Casal lembrou que o obxectivo último destas medidas de protesta é "que o Goberno da Xunta recapacite e que sente a negociar cos interlocutores sociais" para negociar a futura Lei de Saúde de Galicia. "Impedir que a fagan a golpe de decreto como a están facendo agora porque polo que non imos pasar é pola supresión de catro áreas sanitarias", engadiu.
MOBILIZACIÓNS
O peche da Illa foi o primeiro dunha serie de seis que a Plataforma en Defensa da Sanidade Pública do Salnés convocou durante o mes de marzo noutros tantos concellos da comarca.
O próximo terá lugar no Concello de Ribadumia o venres 9. Despois levarán a cabo en Vilanova, Catoira e Cambados para finalizar co de Vilgarcía o 20 de marzo, precisamente o día no que está previsto o debate sobre a reforma da Lei de saúde galega no Parlamento de Galicia.
