Cuantiosas perdas económicas, cuxa valoración inicial oscila entre os 4.000 e os 6.000 euros aproximadamente, é a consecuencia da actuación dun grupo de vándalos nun viñedo de uva albariña situado en pleno corazón da comarca do Salnés. Unha familia da parroquia de San Martiño descubriu este domingo que boa parte da leira, na que posuían numerosas cepas de albariño, quedou practicamente inservible, despois de que uns descoñecidos botasen abaixo as pedras que exercen como soporte das parras. Como consecuencia, miles de acios de uva acabaron polos chans, totalmente inservibles.
Os afectados sospeitan que os feitos puideron ter lugar ao longo do pasado fin de semana. Probablemente, en plena noite. "Eu pasei por alí hai uns días e deume a sensación de que unha parra estaba algo caída, pero ao principio pensei que sería porque se soltou o amarre", explicou a propietaria do viñedo afectado, situado na localidade de San Salvador de Meis. Foi un veciño das inmediacións o que descubriu que os danos eran moito máis graves e que, con toda probabilidade, foran provocados a conciencia. "Chamáronos e dixéronos que unha parte da viña estaba tirada no chan", explican os propietarios, que planeaban iniciar a vendima a principios da próxima semana.
A parcela conta cuns 6.000 metros cadrados de extensión e os danos afectan a practicamente o 75% do viñedo, o que invita a pensar que os vándalos se tomaron o seu tempo á hora de deixar a súa pegada. As boas condicións meteorolóxicas que veñen rexistrando desde hai semanas descartan calquera outra hipótese que non teña que ver coa man intencionada do home. Os afectados non só móstranse doídos polo sucedido, senón tamén moi sorprendidos, porque "isto é algo que nunca antes nos tinga acontecido. Levamos moitos anos traballando e nunca tivemos ningún tipo de problema cos veciños, nin eles connosco", salientan.
Os propietarios da leira devastada son socios dunha adega que habitualmente se nutre deste viñedo para producir viño. Agora, o futuro da colleita é unha auténtica incógnita. "Imos intentar salvar todo o que poidamos, pero perdeuse moita uva. O dano que nos fixeron con isto é considerable", lamentan os donos do viñedo de Meis, que confirman que os feitos xa foron postos en coñecemento das autoridades locais. Agora, abrirase unha investigación para tratar de identificar aos causantes destes actos vandálicos.
Dáse a circunstancia de que a parcela se atopa a poucos metros da Autovía do Salnés.
