Carril, e os barrios dos Duráns e O Piñeiriño, serán os primeiros espazos nos que o Concello de Vilagarcía ten previsto implantar o que denomina Zona Residente.
Este sistema, que está a ser aplicado en diversas cidades desde hai varios anos, outorga aos residentes prioridade á hora de estacionar os seus vehículos no barrio no que viven, especialmente naqueles densamente poboados e tamén nos que escasean as prazas de aparcadoiro.
A implantación da Zona Residente é un compromiso anunciado polos socialistas durante a pasada campaña electoral, recorda o Goberno local, que converterá en realidade ao longo dos próximos meses.
A Concellería de Mobilidade promove esta medida, que será regulada no marco da Ordenanza de Municipal de Tráfico, un motivo polo que o seu articulado está a ser deseñado conxuntamente coa Policía Local. A previsión anunciada polo Concello de Vilagarcía pasa por outorgar a aprobación da modificación da Ordenanza no próximo Pleno, o correspondente ao mes de xullo. Tamén apunta que nas semanas previas á sesión convocará á Xunta de Voceiros para explicar a proposta e recoller as achegas que os restantes grupos (PP, BNG, En Común, Marea na Vila e Ciudadanos) poidan facer para mellorar o proxecto.
Neste documento estarán especificados os requisitos e o procedemento para obter o cartón de residente, así como as normas de funcionamento da Zona Residente e os espazos nos que será aplicada.
En principio, será posta en marcha naqueles lugares máis densamente poboados e con carencia de prazas de aparcadoiro. Os Duráns e O Piñeiriño reúnen as dúas características, ao contar cunha elevada concentración de bloques de vivendas que, na maioría dos casos, carecen de garaxes, o que obriga aos seus inquilinos a aparcar nas rúas.
En Carril abundan as vivendas unifamiliares e os edificios de poucos pisos, pero tamén carece de garaxes e as súas rúas estreitas impiden dispor de espazo para crear prazas de estacionamento.
A terceira das medidas para facer compatible as humanizacións coa mobilidade foi a creación de bolsas de aparcadoiro público na leira da familia Rei, en Carril; os solares da Avenida de Cambados e xunto ao Pavillón de Fontecarmoa, Os Duráns e Marxión.
No entanto, o Concello asume que debe "facilitar máis a vida dos residentes, dándolles máis facilidades para estacionar o máis cerca posible das súas casas".