O Concello de Vilagarcía segue traballando na posta en marcha de medidas que permitan realizar unha xestión dos residuos urbanos máis eficaz, sostible e respectuosa co medio ambiente. Neste marco sitúase un novo plan que porá en marcha e aposta pola separación e recollida individualizada dos orgánicos da bolsa de lixo convencional.
Cun horizonte de posta en marcha do servizo a finais do ano 2021, o Goberno local expón que o primeiro paso é a adquisición de 42 colectores marróns específicos para o depósito da fracción orgánica do lixo, de 600, litros de capacidade cada un.
O proxecto ten un custo de 130.000 euros, para cuxa financiamento o Concello conta cunha subvención de 100.000 do Fondo Europeo de Desenvolvemento Rexional-Galicia 2014-2020. A cantidade restante correrá a cargo da Administración local.
Este sistema tamén está destinado aos bares, restaurantes e supermercados, do mesmo xeito que á Praza de Abastos, e permitirá reducir o volume de residuos que se trasladan á planta de Sogama para a súa incineración.
Ademais de rebaixar os custos económicos desta xestión, o sistema tamén reportará beneficios ambientais. Por unha banda, ao reducir o volume a queimar minora a emisión de gases á atmosfera, e, por outro, os residuos poden reutilizarse para a elaboración de compost, entre outros posibles destinos.
