O Concello de Vilagarcía ampliará ata finais do ano 2022 o plan de recuperación económica posto en marcha para paliar os efectos da crise xerada pola pandemia. Ao millón de euros orzados inicialmente, pretende sumar 815.100 solicitados con cargo ao programa europeo Next Generation, e que destinaría á revitalización do comercio de proximidade.
A proposta concreta o ámbito de actuación, tanto na Praza de Abastos, como no pequeno comercio. As accións a realizar oriéntanse á transformación dixital, actuacións de sustentabilidade, economía circular, formación do sector e intervencións en materia de adecuación de espazos, eficiencia enerxética e xestión de residuos. O obxectivo é a modernización do tecido comercial.
A proposta estrutúrase en tres eixos: a recuperación de mercados tradicionais coa adquisición de caixas de recollida intelixentes para a compra e a posta en marcha dunha repartición a domicilio mediante vehículo eléctrico.
Tamén prevé obras de adaptación e mellora dos espazos e accesibilidade, a implantación dun sistema de valorización enerxética dos residuos orgánicos e o acondicionamento da planta superior do edificio para levar a cabo accións formativas en materia de consumo.
O segundo centrásese no comercio e inclúe a súa dixitalización implantación de zonas de carga e descarga e puntos de entrega intelixentes en diferentes zonas. O terceiro enfócase a medidas como a creación dun banco de locais comerciais, eventos para a revitalización das zonas comerciais, ornamentación, obras de accesibilidade e instalación dunha sinalización conxunta.
