O número de casos de violencia de xénero activos en Vilagarcía de Arousa ascendía a 46 o ano pasado, atendendo aos datos compartidos na xunta local de seguridade celebrada este mércores. A subdelegada do Goberno en Pontevedra, Maica Larriba, presidiu o encontro, no que se asinou o novo protocolo de colaboración entre as forzas e corpos de seguridade do Estado e a Policía Local, no marco do programa de seguimento integral das vítimas de violencia de xénero.
Segundo destacou Larriba, Vilagarcía de Arousa é o sétimo concello da provincia en renovar o protocolo do Sistema VioGén, o que permite ás forzas e corpos de seguridade local e estatal "compartir información e recursos e establecer uns criterios básicos de colaboración e coordinación".
De acordo cos datos comunicados este mércores, a día de hoxe neste concello contabilízanse 46 casos activos de violencia de xénero, dos que 44 contan con algún tipo de orde de protección. Do total, dous casos están clasificados como de risco alto, 10 como de risco medio, 21 de risco baixo e 13 de risco non apreciado.
De acordo co protocolo, a Policía Nacional encárgase do seguimento de 36 vítimas e a Policía Local, das 10 restantes. O 43% teñen entre 31 e 45 anos e o 47% dos agresores sitúanse na mesma franxa de idade. Ademais, 39 vítimas son españolas e 7 estranxeiras.
