O arquivo do Concello de Vilanova, que está situado actualmente na primeira planta da Praza de Abastos da localidade, terá en breve unha nova localización, e será nun baixo situado na Avenida das Sinas.
O cambio de emprazamento fará posible que a actividade comercial que se realiza no mercado dispoña de máis espazo, circunstancia que redundará nunha mellora das condicións de traballo dos vendedores.
O baixo das Sinas tamén se converterá nun almacén no que o Goberno local gardará a maquinaria de mantemento. Un terceiro uso que podería ter é o de centro social para os veciños que viven na súa contorna.
Estas utilidades foron detalladas este luns polo alcalde, Gonzalo Durán, durante unha visita na que estivo acompañado polo conselleiro da Presidencia, Alfonso Rueda; o delegado territorial da Xunta, José Manuel Cores Tourís, e o edil de Innovación Tecnolóxica, Javier Tourís.
O baixo ten 900 metros cadrados, dos que o Concello adquirira inicialmente 700 e despois fíxose coa propiedade dos 200 restantes. O investimento ascende a 110.000 euros, dos que a Administración local achegará 20.000, e o resto correrá a cargo de Presidencia. Durán expuxo a súa confianza en que a Consellería de Industria aprobe unha axuda para a reforma da Praza de Abastos, unha vez que se realice o traslado do arquivo.
Esta operación de compra foi feita pública no mes de xuño do ano 2018 e o Concello de Vilanova executouna ao chegar a un acordo cos responsables do Plan Nacional sobre Drogas, ao tratarse dunha propiedade incautada ao clan dos Charlines.
