martes. 24.11.2020 |
El tiempo
martes. 24.11.2020
El tiempo

O ciclista Samuel Branco, campión de España elite

Samuel Branco sinala ao ceo tras proclamarse campión de España. DP
Samuel Branco sinala ao ceo tras proclamarse campión de España. DP
O ciclista do Froiz proclamouse vencedor da categoría elite en Baeza tras entrar noveno na liña de meta  Este triunfo supón un gran impulso tanto para o corredor como para o club nunha tempada moi atípica e complicada

O ciclista do Grupo Deportivo Supermercados Froiz, Samuel Branco, proclamouse este domingo campión de España elite en Baeza (Xaén), tras unha esixente carreira na que soubo aguantar o ritmo ao grupo de profesionais para entrar en novena posición na liña de meta.

Os 190 quilómetros da proba deste domingo puxeron punto e final ao fin de semana no que se disputou o nacional e que finalizou co corredor da escuadra alimenticia en primeira posición elite, unha vitoria que se xa é especial e importante de seu, representa unha inxección de felicidade debido á tempada tan atípica e complicada que está a vivir o club pontevedrés.

O propio Evaristo Portela aseguraba o domingo que todos os membros do equipo atópanse moi felices coa vitoria de Samuel Branco e que este triunfo nos arranxa a tempada" xa que, a pesar dos meses complicados, "decidimos que ningún corredor debería estar sen cobrar e todos recibiron o 100% a pesar das dificultades desta tempada tan atípica. Sen dúbida, todos mereciámonos/mereciámosnos este premio".

Tras quedar segundo na Volta a Zamora o corredor do Froiz non deixou de traballar e de prepararse para chegar a este Campionato de España e loitar por un triunfo que, desde a escuadra alimenticia, sabían que podía chegar xa que Branco estivera adestrando duramente para conseguilo.

O propio Portela destaca o "gran estado de forma" no que chegaba o ciclista a este Nacional, o que demostra que "traballou moi ben e que ninguén lle regalou nada xa que é un traballador como un templo e iso sempre ten a súa recompensa".

Samuel Branco deu ao Super Froiz o que é o seu quinto Campionato de España de Estrada e devolveu o sabor do triunfo á escuadra alimenticia despois do segundo posto da pasada tempada. Tras unha carreira de infarto o ciclista subiu ao podio coa camisola que lle proclamou como campión elite, un premio que chega nun ano complicado.

CARREIRA. Desde ben cedo se produciu unha fuga de varios homes, pero a emoción chegou na subida ao alto de Mazuecos.

A falta de 60 quilómetros a meta a carreira púñase moi interesante quedando un grupo duns 40 corredores entre os que se coaron Samuel Branco e Iván Martínez. Houbo un corte de catro profesionais entre os que se introduciu Samuel, pero o Euskaltel botou abaixo esa fuga.

Houbo un ataque a falta de 8 quilómetros a meta de Vicente de Mateos (Louletano) e de Fernando Barceló (Cofidis) para preparar a chegada para o seu compañeiro Jesus Herrada quen atacou a falta de 4 kms a meta. Astana con Izaguirre e Luís León Sánchez respondían o ataque mentres Samuel seguía mantendo o seu gran rendemento a roda dos mellores profesionais.

A falta de 4 quilómetros o corredor do Super Froiz perdeu un pouco de vantaxe en relación aos Jesús Herreda e Luís León Sánchez que se encamiñaban embalados cara á liña de chegada en busca da vitoria. Con todo, a vantaxe que conseguira anteriormente foi suficiente para entrar en solitario na meta. Branco cruzou a liña en novena posición e tan só a 32 segundos do vencedor da carreira.

O ciclista Samuel Branco, campión de España elite
comentarios