PONTEVEDRA. En aras de potenciar o uso rotatorio das prazas de aparcadoiro e dar cabida a un maior número de coches, o Concello estuda a posta en marcha de dúas medidas para as que xa comezou a preparar o terreo.
A primeira consistirá na ampliación das zonas de estacionamento limitadas por tempo. Para iso, o Goberno local prevé converter varias das prazas que na actualidade carecen de restricións en zonas de carga e descarga e servizos, nas que o usuario deberá respectar un horario e uns tempos.
A lista de lugares candidatos está practicamente redactada e, aínda que, polo momento gárdase baixo chave, este xornal puido coñecer que a Praza de Barcelos é unha das candidatas máis firmes para participar neste proceso de conversión.
Se, finalmente, leva a cabo, os centos de usuarios que rodean a praza a diario en busca de aparcadoiro gratuíto terán que cambiar o chip e estar ben atentos ás agullas do reloxo se non queren atoparse cunha sanción e o coche no depósito. Non como ocorre a día de hoxe, cando as únicas restricións ás que hai que prestar atención son as zonas reservadas para discapacitados, servizos sanitarios e carga e descarga.
Máis tempo
A segunda proposta compensa dalgún modo o aumento do número de prazas de aparcadoiro con límite de tempo e a inminente chegada do multámovil. E é que o Concello ten previsto ampliar o prazo de 15 minutos que rexe a maioría das prazas de servizos (aptas para todo o mundo), para pasar á media hora de estacionamento permitida para a carga e descarga.
Neste caso a proposición aínda está en fase de maduración, aínda que conta con todas as papeletas para converterse nun feito. Fontes municipais aseguran que a decisión está practicamente tomada e que só depende da orde definitiva por parte do aparello político.
