O alumnado de Fisioterapia cede as súas mans a eventos deportivos e Brilat

Un grupo de once alumnos colaboró de manera desinteresada con el Campeonato de España de Duatlón
photo_camera Un grupo de once alumnos colaboró de manera desinteresada con el Campeonato de España de Duatlón

PONTEVEDRA. A colaboración dos centros universitarios do campus de Pontevedra é, en moitas ocasións, imprescindible para o desenvolvemento dos grandes eventos deportivos e culturais acollidos pola cidade. A facultade de Fisioterapia conta cunha Unidade de Voluntarios que cede as súas mans aos deportistas que participan en diversas maratóns e carreiras populares e que este mes se porá a disposición dos soldados da Brigada de Infantería Lixeira Aerotransportable (Brilat).

No entanto, a pesar de atoparse en pleno período de exames, 11 alumnos de 3º e 4º curso do Grao en Fisioterapia sacaron tempo para colaborar de xeito totalmente desinteresado no Campionato de España de Dúatlon, que tivo lugar o pasado fin de semana en Pontevedra. Así, entre as xornadas do sábado e o domingo, estes futuros profesionais atenderon a un centenar das máis de 500 persoas que se inscribiron para participar nalgunha das tres modalidades do campionato: deportistas de elite, paraduatlón e carreira popular.

Esta colaboración non foi un feito illado, xa que a Unidade de Voluntarios de Fisioterapia protagoniza unha media de entre 12 e 15 actividades extracurriculares similares a esta cada ano. Tal e como sinala o coordinador do departamento do centro universitario, José Manuel Pazos, este tipo de eventos supoñen "unha oportunidade única que serve de complemento á súa formación académica nun momento complicado, xa que, os alumnos e alumnas están en plena época de exames e moitos deles están a preparar o seu traballo de fin de grao".

No entanto, esta Unidade de Voluntarios permite que unha pequena parte do alumnado da facultade tome contacto, por primeira vez, coa realidade da profesión e cos pacientes a través destas actividades, o que, en opinión de Pazos achega aos acontecementos deportivos "un valor engadido digno de mención".

Boa acollida

Os usuarios do servizo móstranse agradecidos e valoran moi positivamente a colaboración do alumnado da facultade de Fisioterapia. Para José Manuel Pazos, proxectos como este son unha boa mostra "do traballo diario" que o centro realizar "con outras moitas institucións da cidade". Ademais, son tamén ex alumnos da facultade os que axudan aos futuros profesionais neste tipo de actividades, exercendo de coordinadores de grupo no lugar de traballo.

Ata agora, a Unidade de Voluntarios de Fisioterapia colaborou en múltiples eventos deportivos, como a Carreira de San Martiño de Ourense, o maratón Vig-Bay e outras moitas actividades organizadas polo Concello de Pontevedra e o Instituto Municipal de Deportes (IMD). De face a este mes, está previsto que acudan á chamada dos soldados da Brigada de Infantería Lixeira Aerotrasportable e, no mes de setembro, porán os seus coñecementos e preparación ao servizo dun maratón nacional.

Comentarios