A poxa de dous pisos de Pontevedra e varias leiras do municipio pontevedrés de Sanxenxo e outra de Rianxo (A Coruña), comisadas ao clan dos Charlines, quedou deserta na poxa que celebrou a Delegación Especial da Axencia Tributaria en Galicia. Únicamente, adxudicáronse dúas prazas de garaxes por importe de 51.750 euros e 54.750 euros cada un deles.
Na terceira das cinco poxas previstas, os dous primeiros lotes, correspondentes a senllos pisos de 59 e 103 metros cadrados, situados na praza Barcelos en Pontevedra, quedaron sen adxudicación ao non presentarse ningunha oferta. O primeiro inmoble saíu a un prezo de 138.000 e de 103.000 na primeira e segunda licitación, respectivamente, mentres que no segundo o prezo foi de 250.000 e 187.500 en cada unha das licitacións.
Agora abrirase un proceso de adxudicación directa para o que estará aberto o prazo de presentación de ofertas ata o 9 de decembro.
PRAZAS DE GARAXE
No terceiro e cuarto lote, saíron a poxa dúas prazas de garaxe, cada unha delas a un prezo de 33.000 euros en primeira licitación e de 24.750 en segunda. Varios compradores optaron á poxa e finalmente foron adxudicadas por un prezo superior, 51.750 a primeira e 54.750 a segunda.
Tamén este mércores quedou deserta a poxa de varias leiras, dun total de 14.217 metros cadrados, situadas en Sanxenxo e cun prezo de 93.551 en primeira licitación e de 70.163 en segunda. O mesmo ocorreu cunha leira de Rianxo, de 4.509 metros cadrados, cun prezo de 35.602 euros, que quedou fixado en 26.701 na segunda licitación.
Así mesmo, a Delegación da Axencia Tributaria en Galicia suspendeu a poxa dun local comercial situado en Madrid, que será poxado or un Xulgado do Social da capital española.
NOVAS POXAS
A poxa do patrimonio das empresas dos Charlines, comisado pola Audiencia Nacional, tras a sentenza ditada en xaneiro de 2003 pola Sala do Penal que condenou a membros deste clan por un delito continuado de branqueo de capitais procedentes do tráfico de drogas, iniciouse o pasado martes, día 5 e concluirá o próximo 19 de outubro..
Ata agora, adxudicáronse unha nave, dúas bateas e unha embarcación auxiliar, mentres que quedou deserta, entre outros, a poxa do Pazo Vista Real, de Vilanova de Arousa (Pontevedra), que pasará a adxudicación directa. Este xoves, día 14, celebrarase unha nova poxa de cinco inmobles, un local e un terreo.
