Os viaxeiros puntuan cun sobresaliente os hoteis pontevedreses

Acabadas as Festas dA Peregrina toca facer balance do que deixaron os centos de turistas que visitaron Pontevedra durante as festas, e unha parte importante dese balance son as opinións que teñen sobre a hostalería local.

Actualmente, as opinións dos usuarios representan un activo invaluable para os hostaleiros. É case indispensable, antes de reservar unha habitación, o revisar a valoración que outros viaxeiros deron ao hotel escollido. Decenas de páxinas web axudan aos viaxeiros a atopar aloxamento durante as súas vacacións, e a gran maioría deles regresa a estas para deixar unha reseña sobre o establecemento no que se hospedaron.

Dúas das máis populares e influentes entre os usuarios son TripAdvisor.es e Booking.com. A primeira realiza un ranking dos hoteis, neste caso dos 31 apuntados na cidade do Lérez, e a segunda puntúanos do cero ao dez.

Entre as principais esixencias daqueles que buscan hospedarse en Pontevedra atópanse, ademais dun prezo razoable, unha localización próxima á zona monumental, un bo servizo de restaurante ou cafetería e instalacións limpas. Así o reflicten as valoracións que deixaron nestas dúas páxinas os viaxeiros que se aloxaron en Pontevedra durante o último mes.

Na súa maioría, os principais hoteis da cidade reciben boas reseñas dos seus hóspedes, o que deixa a puntuación media nun sobresaliente aínda que, como é normal, algunhas destas opinións non son favorables.

MÁIS VALORADOS. Entre os Hoteis con mellor valoración da cidade atópanse, o Hotel Avenida, que despunta entre os aloxamentos apuntados ata colocarse no segundo posto do ranking de Trip Advisor, do que os usuarios destacan a súa excelente atención e unhas instalacións bastante novas. Outro dos máis destacados fose do casco antigo atópase xusta fronte ao anterior, o Hotel Room recibe boas valoracións pola súa localización próxima tanto ao centro como ás estacións de bus e tren, así como polo ambiente moderno do seu restaurante.

Dentro da zona monumental atópase, no posto seis, o Hotel Boa Vila, que chama a atención dos visitantes por ser un edificio antigo reformado, e por unha localización inmellorable con respecto aos atractivos turísticos. A unhas rúas deste último, en plena Praza dA Leña, está en Hotel restaurante Rúas, un dos aloxamentos mellor valorados do centro histórico, cun 8,5 de puntuación. Destaca, principalmente, pola súa localización e o illamento sonoro das habitacións, ademais de por un servizo de restaurante ao que a maioría dos usuarios dan unha valoración bastante alta.

De escoller un atributo que deben ter os hoteis dunha cidade como Pontevedra para estar entre os mellor valorados, ese sería unha atención que faga que os visitantes se sintan como en casa.