Os veciños da rúa Camiño de Ferro están indefensos fronte ás subidas no prezo do aluguer que quere aplicarlles a socimi propietaria do seu bloque. Así o corrobora o portavoz da Plataforma de Afectados pola Hipoteca (PAH) en Pontevedra, Diego Feijoo. "Non teñen moito marxe", resume. "A estas empresas non lles interesan os alugueres baixos e moito menos os alugueres sociais; as socimis buscan inquilinos de alto nivel adquisitivo", explica Feijoo.
Con todo, existe a posibilidade de prolongar o contrato un ano máis nos casos nos que as notificacións acerca das novas condicións non cheguen no prazo e a forma adecuados. "Se esas notificacións non chegaron con 30 días de antelación e por escrito, o contrato pódese alargar un ano máis nas condicións anteriores", explica. Esta sería unha solución temporal, xa que ao cabo dun ano a compañía propietaria dos inmobles podería aplicar a subida.
O fenómeno que describe o portavoz da PAH ten nome e xa se está facendo notar en grandes cidades: gentrificación. Trátase da expulsión de persoas de clase media do centro das cidades para alugar inmobles reformados a xente de maior nivel adquisitivo. Un fenómeno paralelo é o da turistificación, do que se debate desde hai tempo en cidades como Barcelona.
NA BOA VILA. En Pontevedra, a aterraxe da socimi Mistral Patrimonio Inmobiliario significa a entrada na cidade dos grandes fondos de investimento que especulan co prezo do aluguer para sacar o máximo rendemento. "Non temos noticia de que ningunha outra socimi adquira inmobles na cidade, aínda que si en Vigo", explica Feijoo.
A socimi Mistral Patrimonio Inmobiliario está situada en Madrid e iniciou a súa andaina no Mercado Alternativo Bolsista (MAB) cun valor de 33 millóns de euros. Entre a súa activos conta con bolsas de pisos de protección oficial e de vivenda libre, como é o caso do inmoble do que é propietario en Pontevedra. As súas propiedades distribúense por toda a xeografía española en cidades como Alacante, Palma de Mallorca, Sevilla ou Albacete, ademais de localidades de Xirona ou Navarra.
A compra do edificio pontevedrés produciuse a principios de 2017 e o anterior propietario era Aforro Corporación Patrimonio Inmobiliario.
"Este é o primeiro bloque que se ve afectado por este problema, pero estamos atentos a ver cantos máis chegan", indica Feijoo, que engade que esta dinámica está en auxe e que na PAH prevén que cada vez máis alugueres dependan de grandes corporacións que especulan co prezo. "Antes os problemas tiñámolos para reacoller a persoas desafiuzadas polas hipotecas, agora a burbulla é do aluguer", conta Diego Feijoo.
Vigo Compañías como Testa Residencial, unha das socimis con máis activos en España, conta con pisos na avenida Hispanidade ou na rúa Pintor Colmeiro. ademais, a socimi Olimpo Real State é propietaria dun local comercial na rúa Urzáiz.
Pontevedra A día de hoxe só se ten coñecemento do bloque de vivendas da rúa Camiño de Ferro, propiedade de Mistral Patrimonio Inmobiliario.
A Coruña Testa Residencial ten propiedades en Cambre, Culleredo e A Coruña cidade. Ademais, conta cun bloque de vivendas en Narón.
Santiago de Compostela Na capital galega, o fondo inmobiliario Azora ten un bloque de edificios enteiro na rúa Salgueiriños de Abaixo.
Ourense As socimis puxeron tamén o ollo en Ourense. deste xeito, dous bloques de edificios situados nas rúas Chano Piñeiro e Montepedroso pertencen a Testa Residencial.
Lugo Diario de Pontevedra non ten constancia de ningún inmoble de socimis na provincia.
Asemblea da PAH A PAH celebra hoxe unha asemblea na que informará sobre este fenómeno e o caso concreto dos veciños da rúa Camiño de Ferro. Será na Casa azul ás 17.30 horas.
