Catro meses máis tarde de ser decretado o estado de alarma aínda é difícil cuantificar o impacto da crise sanitaria no tecido empresarial do municipio. Con todo, segundo os datos manexados pola Cámara de Comercio a pandemia puido provocar o peche (provisional ou temporal) de 151 firmas con sede no concello pontevedrés, dado que en febreiro tiña constancia de 7.918 códigos de identificación fiscal diferentes e actualmente o reconto queda nos 7.767.
As cifras debuxan unha (leve) redución da patronal, pero como ocorre con moitos outros indicadores a lectura esixe abrir paréntese. O primeiro é que, así como as empresas teñen que comunicar a súa apertura con carácter previo, para notificar a baixa dispoñen de tres meses e en moitos casos é un prazo que se ve superado, polo que aínda hai que ser cautos con este tipo de balances. Ademais, non hai que esquecer que unha empresa siga activa está lonxe de significar que continúe coa mesma facturación ou persoal.
A parte máis positiva é que, aparentemente, as actividades que desenvolven as firmas sobreviventes non só se manteñen, senón que soben, pasando das 11.386 de febreiro ás 11.397 de xullo, o que invita a pensar que varias empresas diversificaron as súas áreas de negocio ou recuperaron algunhas suspendidas por mor da pandemia, como poden ser as que combinan alimentación e hostalería.
PARO. A Enquisa de Poboación Activa (EPA) publicada o pasado 28 de xullo sitúa a taxa de paro en Pontevedra no 7,9%, o nivel máis baixo desde que existen rexistros. O dato, que se corresponde co segundo trimestre de 2020, parte da suposta existencia de 2.800 desempregados na cidade, pero de novo é unha cifra que hai que coller con pinzas.
Segundo o SEPE, Pontevedra pechou xuño con case o triplo de persoas en situación de desemprego: 6.176 parados, dos que o 72% son do sector servizos.
O Concello ultima a tramitación das axudas a autónomos, nas que investirá 1,25 millóns
O Concello continúa coa tramitación do plan de axudas deseñadas para autónomos e pequenos empresarios, no que prevé investir 1,25 millóns. O Consistorio xa remitiu un primeiro borrador cos obxectivos e requisitos a diferentes asociacións empresariais. Neste pódese ver que as axudas, que terán que executarse antes do 30 de decembro, están dirixidas á modernización, mellora, adaptación e dixitalización dos negocios; ao embelecemento interior e exterior ou á mellora da accesibilidade e da eficiencia enerxética. Os proxectos non poden superar os 12.000 euros e o financiamento máximo será do 70% do custo da actuación.
Estas axudas súmanse a outras impulsadas desde outras institucións para paliar o impacto do coronavirus. A Cámara de Comercio convocou subvencións valoradas nun millón de euros e a Xunta impulsou varios programas, entre os que destaca unha nova liña de axudas de 16 millóns para facilitar a volta á actividade respectando as medidas anti-covid.
"As prestacións que chegaron correctamente ao SEPE están todas recoñecidas e pagas", aseguran fontes oficiais do servizo, que engaden que "as que non se cobraron son relativas a fallos na documentación remitida polas empresas", como poden ser erros nos "códigos conta", datos mal cumprimentados ou traballadores non incorporados ao sistema.
