A Asociación Down Pontevedra Xuntos segue sumando colaboracións para o seu programa Emprego con Apoio, destinado a facilitar a inserción no mercado laboral dos seus integrantes. Nesta ocasión é Carlos Conde Peluqueros SL a firma que incorporará ao seu equipo a Verónica Rosales Patiño, unha das usuarias da asociación, que o vindeiro luns comezará a traballar no departamento de almacén e pedidos desta exitosa firma pontevedresa. Tal e como explicou a moza, a súa experiencia comezará cun período de prácticas ata o mes de marzo e posteriormente asinará un contrato co obxectivo de entrar a formar parte do persoal de xeito indefinido.
Verónica Rosales agradeceu a oportunidade que lle ofrece o empresario Carlos Conde Gil, quen tamén aproveitou o acto de firma do convenio para enxalzar a boa disposición da súa nova empregada, así como o labor que realiza Down Pontevedra Xuntos a favor da integración plena dos seus integrantes. De feito, sinalou que a súa firma de barbería, que conta xa cun centenar de centros en España e fóra do país, non descarta novas colaboracións coa asociación nun futuro.
O presidente de Down Pontevedra Xuntos, Manuel Pérez Cabo, agradeceu a súa implicación e a de todas as empresas que participaron no programa Emprego con Apoio, que no ano 2018 foron 24.
Pérez: 18 participantes conseguiron asinar contratos laborais ou de prácticas
"O ano recentemente terminado foi realmente moi produtivo para esta entidade e os usuarios deste plan de emprego, pois os seus 18 participantes conseguiron asinar contratos laborais ou de prácticas", destacou Pérez.
SEGUIR MELLORANDO. Con todo, o presidente da asociación precisou que segue habendo partes negativas, como "a precariedade laboral tanto nos horarios como na duración dos contratos", por iso é polo que sinalase o obxectivo de seguir "traballando para mellorar esas cuestións", dixo.
Down Pontevedra Xuntos creou Emprego con Apoio no ano 2002 e "desde entón moitas empresas prestáronse a colaborar. Agora estreamos 2019 xunto a Carlos Conde Peluqueros e esperamos que este ano sexa igual de produtivo para os nosos usuarios", indicou Manuel Pérez Cabo.