Os abandonos seguen aumentando e cada vez a protectora Os Palleiros acolle a un maior número de cans que chegan en malas condicións. "De 147 que temos agora mesmo, un 30% son de caza e son os que chegan en peores condicións, tanto física como psicoloxicamente", asegura Gloria Cubas, a presidenta da asociación.
Este ano, en concreto, notouse un aumento do abandono especialmente en femias preñadas ou coas súas crías. "En total tivemos cinco nais coas súas camadas e unha delas foi de nove. Chegamos a xuntarnos con 25 cachorros recentemente", confirma Cubas. Aínda así, canto máis pequenos, aumentan as posibilidades de adopción. O problema é que chega un punto no que "entran máis dos que saen". Isto ocorre especialmente nesta época do ano que é cando aumenta o índice de abandono, do mesmo xeito que cando termina a tempada de caza ou poucos meses despois do Nadal. "Se non es consciente de que che vai a levar un gasto de diñeiro e un sacrificio non o teñas, pero tampouco o abandone nin moito menos maltrátelo", indica Gloria Cubas.
Os máis difíciles de dar en adopción son aqueles catalogados como cans potencialmente perigosos. "Requírense moitos máis requisitos. Necesítase unha licenza, un certificado de penais, un psicotécnico, un papel do Concello e un seguro de responsabilidade civil de mínimo 250.000 euros", apunta a presidenta da asociación.
Este ano notouse un aumento do abandono de femias preñadas
ACTIVIDADES. O próximo 1 de setembro, a protectora únese á iniciativa proposta por Pontepatas e Triana, Jota, Mara, Tandi, Yuka e Pere realizarán o Camiño de Santiago xunto a outros cans. Este proxecto ten como obxectivo visibilizar os cans da entidade e conseguir que aumente o número de adopcións. "Xa o fixemos hai dous anos e os dous cans que levamos connosco foron acollidos nun fogar", confirma Cubas.
Outro dos motores principais para conseguir adopcións son as redes sociais. A través destes medios de comunicación, Os Palleiros é capaz de sensibilizar a moitas persoas e conseguir cubrir algunhas das súas necesidades. "Pomos en Facebook o que necesitamos e a xente sempre se envorca moito", destaca a presidenta da ONG.
