A situación que atravesa o sector hostaleiro de Pontevedra non é exclusiva da cidade. Desde a Asociación Provincial de Hostaleiros aseguran que actualmente o 70% dos establecementos hostaleiros da provincia estuda botar o peche porque non lle dan as contas. O presidente deste colectivo, César Sánchez Ballesteros, recoñece que a situación da Boa Vila é similar á de poboacións como Santiago ou Baiona, que foron as grandes prexudicadas desta pandemia. "Pontevedra vive moito do Camiño de Santiago, que foi totalmente inexistente desde o inicio da pandemia. Todo ese fluxo de xente desapareceu", sinala Sánchez Ballesteros.
O presidente do colectivo provincial de hostaleiros subliña que o turismo de Pontevedra alimentouse moito de eventos deportivos "e agora a maioría anuláronse". "Nós mirabamos con envexa todos os eventos deportivos que Pontevedra era capaz de xerar e que agora se viu minguada pola pandemia", engade César Sánchez, que chama a atención sobre a ausenia de citas como Conxemar, que se celebra a primeiros de outubro e que ano a ano enchía os hoteis de Vigo e Pontevedra. A isto únese que as cifras do verán non foron tan espectaculares na contorna urbana como en Sanxenxo ou Vigo que "co tirón de Cíes" salvaron os mobles.
Asegura o presidente provincial dos hostaleiros que o 70% dos establecementos da provincia está en números vermellos e estase expondo botar o peche durante a tempada baixa "porque os números non dan". E destaca que é unha situación inédita na provincia. "No meu hotel cando tivemos que pechar polo confinamento non atopabamos a chave para pechar a porta", sinala o propietario do Hotel Bahía de Vigo.
MEDIDAS. ¿E que é o que reclama o sector hostaleiro? Desde ASEHOSPO expoñen medidas como descontos nas taxas e impostos proporcionais aos días que «tivemos que pechar por lei», así como prorrogar os impostos ou facilitar o pago fraccionado dos mesmos. "Polo menos do IBI que supón un desembolso importante". Crear bonos e promocións para impulsar as pernoctaciones nos establecementos da provincia é outra das medidas que se están solicitando aos concellos, así como investir os orzamentos de eventos cancelados en turismo, aínda que, en palabras de César Sánchez, "atopamos pouca sensibilidade no Concello de Pontevedra".
Desde ASEHOSPO critican que se estea "criminalizando" ao sector da hostalería. "Os estudos que nos pasan din que a incidencia dos contaxios é dun 2,5% en restaurantes e cafeterías, moi por baixo do que está a ocorrer noutros sectores", advertiu.
