O papel social das empresas púxose este xoves de manifesto nun acto que tivo lugar en Cruz Vermella. A ONG quixo agradecer ás compañías da comarca que colaboran no seu Plan de Emprego o seu compromiso, grazas ao cal 256 usuarios da organización en risco de exclusión social conseguiron traballo este ano.
"Sen a colaboración destas empresas para nós sería difícil conseguir a inserción laboral dos nosos usuarios", sinalou a coordinadora do Plan de Emprego de Cruz Vermella, Carmen Abeigón.
Así, a sede da organización acolleu unha homenaxe ás empresas colaboradoras no que se fixo entrega dun diploma aos representantes das compañías.
"Chegamos a dúas conclusións: a vulnerabilidade achega innovación, valor e vantaxe ás empresas", manifestou Abeigón tras a charla que impartiu Elba Pedrosa sobre creatividade e empresa na homenaxe. "A mestura do talento, a diversidade e creatividade é unha diferenza estratéxica. Queremos reforzar a mensaxe de que a diversidade é positiva para as empresas", engadiu a responsable do Plan de Emprego.
Os datos de 2018 son moi positivos. O 73% dos usuarios do Plan de Emprego conseguiu un contrato laboral este ano. En total foron 21 os convenios de colaboración asinados coas empresas e 169 as ofertas xestionadas. "Por iso pedimos ás empresas que sigan apostando pola nosa xente", engade a coordinadora.
Cruz Vermella xestionou este ano 169 ofertas laborais e asinou 21 convenios coas empresas da comarca
DESDE 2000. O Plan nacional de emprego de Cruz Vermella naceu fai 18 anos. Posteriormente púxose en marcha en Vigo e en Pontevedra levou a cabo algún proxecto puntual de inserción laboral, pero foi en 2012 cando comezou aquí con máis forza a consecuencia da crise. Inicialmente atendía a 50 mozos e o equipo estaba formado por un técnico e un voluntario. A día de hoxe leva a cabo sete proxectos e dá cobertura a 350 usuarios.
Cruz Vermella atende a todas as persoas que están desempregadas que solicitan a súa axuda. "Vén moita xente maior de 45 e 55 anos. Traballamos con mulleres con dificultades engadidas como vítimas de violencia de xénero, o que non puideron optar a formación, e mozas que se desengancharon do traballo estable", explica a organización.
Os postos aos que adoitan optar os usuarios do Plan son prazas de baixa cualificación, principalmente no sector servizos, aínda que cada vez máis no ámbito industrial.
Álvaro Segura, responsable de RR HH de Carrefour Pontevedra
Carrefour é unha das 30 empresas da comarca que colabora co Plan de Emprego de Cruz Vermella.
Este tipo de colaboracións facémolas a través da Fundación Solidariedade Carrefour, que nace en 2001 co obxectivo de abordar distintos asuntos de carácter social. Apoia proxectos en beneficio da infancia con discapacidade, colectivos vulnerables ou persoas en risco de exclusión social e actúa en situación de urxencia.
¿E en Pontevedra?
Para nós é crave ser un bo veciño na cidade onde esteas, ser socialmente responsables. Unha das actuacións máis reconocibles é a actuación en plans de emprego. En 2018 participaron connosco neste Plan de Emprego catro alumnos entre azafato/a de caixa e produtos frescos, cun total de 680 horas de formación práctica. Actualmente, as oito persoas que se atopaban aprendendo están a colaborar connosco a través dun contrato laboral.
¿Que valoran das persoas que proceden do Plan de Emprego?
O que valoramos principalmente é a actitude, a motivación por querer achegar á compañía e a atención ao cliente. Queremos agradecer a Cruz Vermella que traballan moi ben con eles. Veñen preparados e adáptanse moi ben á nosa empresa.
