A primeira xornada na que entran en vigor novas restricións na presente pandemia adoita ser moi activa en canto a controis preventivos de vixilancia, e este venres non foi unha excepción. A situación de confinamento perimetral de xeito individual do termo municipal de Pontevedra obrigou aos distintos corpos de seguridade a establecer dispositivos nas principais entradas e saídas do centro urbano coa intención de informar, disuadir e, se non hai máis remedio, denunciar a quen pretendesen incumprir coas novas restricións decretadas pola Xunta de Galicia. O resultado provisional do despregamento resulta esclarecedor, e vén demostrar que a inmensa maioría dos cidadáns axústanse aos ditames, por moi discutibles que sexan. Así, dos condutores dos 620 coches que foron obxecto de control e identificación durante a xornada, só dúas resultaron denunciados. O resto, ou ben tiñan unha causa xustificada para entrar ou para saír de Pontevedra, ou ben se dirixían desde un municipio sen restricións (neste caso, Marín) a outro sen restricións, facendo uso do dereito de paso que concede a normativa. Estes datos desvelan que o 99,7 por cento dos condutores que foron identificados cumprían coa normativa e apenas un 0,29 % pretendía saltala.
En canto á localización dos dispositivos de vixilancia, as policías locais de Pontevedra e Marín (especialmente a primeira, máis numerosa) e a Policía Nacional estableceron controis conxuntos, prestando especial atención aos viarios que unen os tres municipios que, ata o xoves, conformaban un perímetro: Pontevedra, Poio e Marín. Os axentes estiveron na zona de Paseo de Colón, acceso á Boa Vila desde Poio, pero tamén nas inmediacións de Estribela, zona limítrofe entre o concello marinense e o termo municipal da cidade do Lérez.
A Policía destaca o excelente grao de cumprimento por parte da inmensa maioría dos veciños da comarca
Fontes da Policía Local de Pontevedra informaron de que pola mañá foron inspeccionados uns 150 turismos, e foi nese espazo temporal cando detectaron os dous únicos presuntos infractores da normativa establecida. O lugar, a entrada desde a ponte da Barca.
Xa pola tarde, os funcionarios centraron os seus esforzos en controlar a entrada de automóbiles procedentes de Marín. Os 300 que inspeccionou o corpo policial pontevedrés tiñan motivo para o seu desprazamento ou ben presentaban o seu xustificante, o mesmo que os 200 que identificou a Policía Local de Marín.
A estes datos habería que engadir o despregamento efectuado polos efectivos do Subsector da Garda Civil de Tráfico. No seu caso, o seu ámbito competencial é moito maior (toda a área Norte da provincia), polo que as cifras serán recompiladas nos próximos días.
