A presidenta da Deputación de Pontevedra, Carmela Silva, anunciou que o persoal da institución regresará ao modelo de teletraballo ante o avance dos contagios da covid-19 nesta terceira onda e solicitou ao Servizo Galego de Saúde (Sergas) un cribado para o persoal e os menores do Centro Príncipe Felipe.
Deste xeito, a institución provincial pretende reducir a presenza física nos postos de traballo susceptibles de poder ser desempeñados mediante traballo en remoto e, naqueles que teñan que prestar o seu servizo presencialmente, impulsaranse as "máximas garantías" para garantir a seguridade das persoas.
Ademais a celebración dos plenos, comisións informativas e xuntas de goberno tamén terán lugar desde agora de forma telemática. A intención, segundo indicou a presidenta, Carmela Silva, é volver analizar a situación en febreiro para ver se se regresa a a modalidade presencial ou se se segue en remoto.
"Levabamos xa dous días reflexionando sobre esta cuestión e onte mesmo o vicepresidente e eu tomamos a decisión, que tamén comunicamos ao portavoz do PP, Jorge Cubela, que mostrou o seu apoio", explicou Carmela Silva, que sinalou que tamén se informou aos sindicatos e remitiuse unha comunicación a todo o persoal.
En canto ao Centro Príncipe Felipe, que desde o inicio da crise sanitaria en marzo ten activa a comisión de seguimento da covid que se reúne periodicamente, están a perfilarse novas medidas ante a situación da terceira onda, como a ampliación do máximo tempo posible da corentena (pasando dos dez días pautados aos catorce) ou as restricións nas saídas, de tal xeito que nas próximas dúas semanas os menores queden en Príncipe Felipe.
A presidenta apuntou que, en canto aos menores do Centro de Día, trasladouse xa a Política Social a necesidade de impulsar novos procedementos para regular as saídas e entradas no recinto.
Tamén se lle trasladará á Xunta a posibilidade de dar prioridade aos centros de menores na próxima programación da vacinación, por tratarse de poboación vulnerable.
